इजरायली सेना गाजामे हमासक लक्ष्य केर लगातार निशाना बना रहल अछि। इजरायली सेना एक बेर फेर गाजामे हवाई हमला कयलक अछि, जाहिमे सात फिलिस्तीनी मारल गेल अछि।
फिलिस्तीनी सूत्र कहलनि जे मध्य गाजामे नुसेरात शरणार्थी शिविर पर इजरायली सेना द्वारा कयल गेल हवाई हमलामे तीन बच्चा सहित सात फिलिस्तीनी मारल गेल अछि।
फिलिस्तीनी सुरक्षा सूत्र समाचार एजेंसीकेँ कहलक जे मंगलदिन साँझमे भेल हवाई हमलामे अबू नड्डा परिवारक एकटा आवासीय घरकेँ लक्षित कयल गेल।
यद्यपि, इजरायली सेना एखन धरि एहि घटना पर कोनो टिप्पणी नहिं कयलक अछि।
एम्हर इजरायली सेना मंगलदिन वेस्ट बैंकमे दूटा कैदीक अपार्टमेंटकेँ उड़ा देलक। कहल जा रहल अछि जे एहि हमलाक बाद कैदीसभक बीच झड़प भेल छल, जाहिमे एकटा फिलिस्तीनी नागरिकक मृत्यु भऽ गेल अछि।
जनतब जे ७ अक्टूबर २०२३ केँ हमास इजरायल पर हमला कयलक। एहिमे हमास १,२०० इजरायली नागरिकक हत्या कऽ देलक आ लगभग २५० इजरायली नागरिककेँ बंधक बना लेलक। एकर बाद इजरायली सेना गाजामे घुसि हमास अड्डा पर कारवाई कयलक।
गाजामे इजरायली हमलामे फिलिस्तीनीसभक मृत्युक संख्या लगभग ४०,००० भऽ गेल अछि। पछिला २४ घंटाक दौरान इजरायली सेना ३२ लोकक हत्या कयलक आ ८८ गोटे घायल भऽ गेल, जाहिसँ फिलिस्तीनी-इजरायल संघर्ष शुरू भेलाक बादसँ मृतकक कुल संख्या ३९,९२९ आ घायलक संख्या ९२,२४० भऽ गेल अछि।
