सीएम साइंस कॉलेज शिक्षकेत्तर संघ केर आमसभाक बैसार शनिदिन राधेश्याम झा केर अध्यक्षतामे भेल। बैसारमे सर्वसम्मतिसँ निर्णय लेल गेल जे बिहार राज्य विश्वविद्यालय एवं महाविद्यालय शिक्षक एवं शिक्षकेत्तर कर्मचारी समन्वय समिति केर आह्वान पर महाविद्यालय इकाईसँ संबंधित सभ कर्मचारी आगामी 9 जनवरीकेँ कारी पट्टी लगाकऽ अपन कार्य करैत संगठन विरोधी फरमान केर बहिष्कार करत। जखनकि 12 जनवरी कें सामूहिक अवकाश पर रहि विश्वविद्यालय मुख्यालय पर आहूत धरना प्रदर्शनमे शामिल होयत। बैसारमे सर्वसम्मतिसँ निर्णय लेल गेल जे संगठन विरोधी फिरका परस्त ताकत केर संगठित भऽ सभ डेग पर मुँहतोड़ जवाब देल जायत आ 16 जनवरी कें राज्य समन्वय समिति केर बैसारमे लेबय बला निर्णय केर अक्षरशः अनुपालन कयल जायत।
बैसारमे इकाई केर सचिव अनुपम कुमार झा प्रस्तावित मांग सभक बारे मे जानकारी दैत कहलनि जे वर्तमान समयमे बिहारक शिक्षा जगत अपातकाल सन स्थिति केर सामना कऽ रहल अछि। शिक्षक आ कर्मचारी केर मौलिक एवं लोकतांत्रिक अधिकारक संग-संग संघ-संगठनसँ संबंधित हमर संवैधानिक अधिकार पर राज्य सरकारक संरक्षणमे शिक्षा विभागक किछु बेलगाम अधिकारी लगातार हमला कऽ ओकरा छीनबाक नापाक कोशिश कऽ रहल अछि, जे अत्यंत निंदनीय अछि।
बैसारक अध्यक्षता करैत इकाई संघक अध्यक्ष राधेश्याम झा एहि बात पर क्षोभ जतौलनि जे संघ-संगठन केर हिफाजत लेल मीडिया अथवा सोशल मीडियामे आवाज उठेनिहार शिक्षक एवं कर्मचारी नेता पर राज्य सरकारक संरक्षणमे दण्डात्मक कार्रवाई केर आदेश लगातार निकालल जा रहल अछि। बैसारमे सभ कर्मचारी एक स्वरमे शासन एवं प्रशासन केर कर्मचारी विरोधी दमनकारी फरमान केर प्रतिरोध करबा आ समाधान होयबा धरि संघर्ष जारी रखबाक फैसला कयल गेल। बैसारमे शिवशंकर झा, उमेश कुमार ठाकुर, रोहित कुमार झा, प्रवीण कुमार झा, आकाश कुमार वर्मा, चेतकर झा, आदित्य नाथ झा, प्रफुल्ल कुमार झा, रमाशंकर भंडारी, रवीन्द्र कुमार यादव, जितेंद्र राम, जितेंद्र कुमार महतो, लीला कुमारी, जरीना खातून, चंद्र कांत चौधरी, दिलीप मंडल, सतीश कुमार, रमेश कुमार कामती, जयकांत कामती, राजेश कुमार सिंह, अनुपम शेखर सिंह, संतोष कुमार, मिसरी साह, युगेश्वर महतो, रामशंकर भंडारी, कुमार राजर्षि आदि उपस्थित छलाह।
