मनीष सिसोदिया दिल्ली शराब घोटालामे आरोपी छथि।
हुनका ईडी आ सीबीआई द्वारा गिरफ्तार कयल गेल छल। सुप्रीम कोर्ट आब हुनका जमानत देलक अछि।
सर्वोच्च न्यायालयसँ जमानत भेटलाक बाद दिल्लीक पूर्व उपमुख्यमंत्री मनीष सिसोदियाक जेलसँ बाहर अयबाक रास्ता साफ भऽ गेल अछि, संभवतः ई समाचार पढ़ैत काल धरि ओ जेलसँ छूटि चुकल रहताह। ओ पछिला साल फरवरीसँ तिहार जेलमे बंद छलथि। सर्वोच्च न्यायालयसँ राहत भेटलाक बाद मनीष सिसोदियाक वकील राउज एवेन्यू कोर्टक विशेष न्यायाधीश कावेरी बावेजा लग पहुँचलाह। जमानत मुचलकाक अतिरिक्त आन सभ आवश्यक दस्तावेज अदालतक समक्ष प्रस्तुत कयल गेल। न्यायाधीश जमानत मुचलका स्वीकार कए लेलखिन। आम आदमी पार्टीक विधायक प्रह्लाद सहनी, पार्षद पुरनदीप, रोशन चौहान आ नवीन चौधरी मनीष सिसोदियाक जमानत मुचलका भरलनि। जकर बाद न्यायाधीश मनीष सिसोदियाक रिहाई आदेशपर हस्ताक्षर कयलनि।
आब न्यायाधीश कावेरी बावेजाक जमानत आदेशक प्रति तिहाड़ जेल लऽ जाय जा रहल अछि। आशा अछि जे मनीष सिसोदिया शुक्रकेँ जेलसँ बाहर आबि गेल रहताह।
सिसोदिया दिल्लीक कथित शराब घोटाला मामिलामे पिछला १७ माससँ जेलमे छथि। हुनका ईडी आ सीबीआई दुनू द्वारा अपन-अपन केसमे गिरफ्तार कयल गेल छल। सर्वोच्च न्यायालय हुनका दुनू मामिलामे जमानत दऽ देलक अछि।
वर्तमान मामिलामे सीबीआई मनीष सिसोदियाकेँ भ्रष्टाचार निवारण अधिनियम आ ईडीकेँ धनशोधन अधिनियमक अन्तर्गत गिरफ्तार कयने छल। दुनू जाँच एजेंसीक आरोप अछि जे दिल्ली सरकार दिल्लीक शराब नीतिक माध्यमसँ दक्षिण भारतक शराब व्यापारीसभकेँ लाभान्वित कयलक। शराब नीतिक माध्यमसँ दक्षिण भारतक व्यापारीसभकेँ लगभग १०० करोड़ टाकाक लाभ देल गेल। बदलामे ओ गोवा चुनाव २०२२मे ७५ करोड़क दऽ दिल्ली सरकारक सहायता कयलक।
ईडी एहि मामलामे आम आदमी पार्टीकेँ सेहो आरोपी बनेने अछि। ईडीक आरोप अछि जे पार्टी सरकारी व्यवस्थाक घोर दुरुपयोग कयलक जाहिसँ ओ गोवामे चुनाव लड़ि सकय। ईडी अपन आरोपपत्रमे अदालतक समक्ष हवाला माध्यमसँ धनक लेनदेनक किछु सबूत सेहो प्रस्तुत कयलक। दिल्लीक मुख्यमंत्री अरविन्द केजरीवाल एखनि एही मामिलामे तिहार जेलमे बंद छथि। ईडी मामिलामे हुनका जमानत भेटल अछि, मुदा सीबीआई केसमे हुनका एखनो रिहाईक प्रतीक्षा अछि।
