मैथिली ठाकुरक पारंपरिक एवं बहुभाषीय गीतसँ सराबोर भेलथि मुंबई केर दर्शक-श्रोतागण

मुंबई समदिया
*

मिथिला नवजीवन ट्रस्ट समितिक स्वर्ण जयंती समारोह बनल सदाक लेल अविस्मरणीय

अंतरराष्ट्रीय ख्याति प्राप्ति उद्घोषक कमलाकांत झा दर्शक ओ श्रोतागणकेँ गुदगुदाबैत मंचक शोभा बढ़ाबैत रहलथि।

‘सिंह पर एक कमल राजित ताहि उपर भगवती’, ‘जगदंबा घरमे दियरा बारि अयली हे’, ‘चारु दुल्हामे बड़का कमाल सखिया’, ‘राम आऐंगे’, ‘उठो सिया शृंगार करो अब धनुष राम ने तोड़ा है’, ‘जगदंब अहीं अवलंब हमर’, ‘मिथिलामे राम खेलय होरी’, ‘राम को देखकर जनक नंदनी’, ‘मिथिला का कण-कण खिला जमाई राजा राम हुआ, ‘….अयले दुल्हा जुड़ाबय लगली हे सासु अपन नयनवा’, ‘विधिना लगाओल जोड़ी केहेन बेजोड़ हे’, ‘ब्राह्मण बाबू यौ’ ‘बाबा हरिहर नाथ सोनपुरमे हो रंग लुटय’ …..आदि आदि आर अनेक मैथिली, हिन्दी, मराठी गीतक कोकिल कंठसँ उन्मुक्त गायन करैत मैथिली ठाकुर उल्हासनगर, मुंबई केर मिथिला नवजीवन समिति ट्रस्टक स्वर्ण जयंती समारोह पर बसंत पंचमी सोमकेँ विशाल सेंचुरी मैदादमे कतेको हजार दर्शक श्रोताकेँ सराबोर करैत रहलीह।

मिथिला नवजीवन समिति ट्रस्टक स्थापनाक एहि बेर स्वर्ण जयंती छल आ ताहि अवसर पर त्रिदिवसीय भव्य आयोजन समिति द्वारा कयल गेल। जनतब जे मिथिला नवजीवन ट्रस्ट समितिक मुंबईमे स्थापित सरस्वती मंदिर अछि, अर्थात सरस्वतीजीक मंदिर अछि, जतय माँ शारदेक भव्य प्रतिमा सभदिनक लेल प्रतिष्ठित छथि। प्रायः एहेन भारतवर्षमे ई अद्वितीय मंदिर अछि।

एहि बेर समितिक स्थापनाक स्वर्ण जयंती समारोह छल आ ०२ फरवरीसँ ०४ फरवरी धरि अनेकानेक आयोजन आयोजित छल। ०२-०३ फरवरीकेँ शतचंडी यज्ञ २१ पंडित द्वारा संपन्न कराओल गेल, हवन-पूजन आरती आदिक बहुत पैघ स्तर पर आयोजन भेल, वैदिक मंत्रसँ गुंजित वातावरणमे माँ शारदेक पूजनमे भक्तगण पूर्ण श्रद्धासँ डूबल रहलाह।

तहिना ०२ फरवरीक संध्या काल समिति द्वारा आगत-आमंत्रित अतिथिगणकेँ सम्मानित कयल गेल। ०३ फरवरीकेँ माँ शारदेक अनेको पंडितक वेदध्वनिक संग पूजन भेल आ तहिना विशाल हवन आ विशाल आरती, अद्भुत क्षण छल।

रात्रिमे मैथिली ठाकुरक कार्यक्रमसँ समारोह चरम उत्कर्ष पर छल। अंतरराष्ट्रीय ख्याति प्राप्ति उद्घोषक कमलाकांत झा दर्शक ओ श्रोतागणकेँ गुदगुदाबैत मंचक शोभा बढ़ाबैत रहलथि। हुनकर अद्भुत वाक्पटुतासँ अर्थात हुनके शब्दमे ‘कहबाक कला’सँ दर्शक आ श्रोतागण मुग्ध छलथि आ दोसर दिसि मैथिली ठाकुर बिना ब्रेकक एक पर एक अपन अद्भुत कंठसँ श्रोता ओ दर्शकगणकेँ एहि तरहसँ आनंदित करैत रहलथि।

बृहस्पतिकेँ विशाल भंडाराक आयोजन छलैक, प्रायः दसो हजार लोक महाप्रसादक भोजन कयलनि।

महिनोसँ मिथिला नवजीवन समिति ट्रस्टक कार्यकर्ता आ पदाधिकारीगण एहि बेर जाहि स्वर्ण जयंती समारोहक आयोजनमे तल्लीन छलथि, से वास्तवमे सदाक लेल अविस्मरणीय रहत।