मिथिला विभूति स्मृति पर्व समारोह एहि बेर होयत २१,२२ आ २३ मार्चकेँ
*
मधुबनी समदिया
*
प्रो शीतलांबर झा महासचिव मैथिल समाज रहिका,मधुबनी प्रेस विज्ञप्ति जारी कय कहलनि प्रत्येक वर्षक भांति एहू वर्ष मिथिला विभूति स्मृति पर्व समारोह आयोजित होयत। एहि बेरक ५१म समारोह अछि, जे २१, २२ एवम् २३ मार्चकेँ रहिका विद्यापति मैदानमे आयोजित कयल जायत। एहि अवसर पर संस्था द्वारा प्रत्येक वर्ष प्रतिष्ठित चारि टा पुरस्कार विभिन्न क्षेत्रक उत्कृष्ट एवम् विद्वानकेँ देल जाइत अछि, तकर चयन आ घोषणा कय देल गेल अछि, जे एहि प्रकारसँ अछि :-
०१) किरण पुरस्कार : प्रसिद्ध कथाकार ,लेखक डॉक्टर नरेश कुमार ‘विकल’ केर ‘चोखगर खोंच’ तीन नाटिकाक किताब’ लेल देल जायत।
०२) यात्री पुरस्कार : प्रसिद्ध कवि, साहित्यकार , लेखक पटना उच्च न्यायालयक अधिवक्ता धीरेन्द्र कुमार झा’क कविता संग्रह ‘अही सभमे कतहु’ लेल देल जायत ।
०३) रवींद्र-महेंद्र सम्मान पुरस्कार : मैथिली मंचक प्रसिद्ध लोक कलाकार राजनीति रंजन गायककेँ देबाक घोषणा भेल अछि।
०४) चुनचुन मिश्र सम्मान पुरस्कार : प्रसिद्ध मैथिली सेनानी मिथिला संघक लोकप्रिय अध्यक्ष विजय चंद्र झाकेँ देबय केर निर्णय भेल।
संस्थाक महासचिव प्रो झा कहलनि मैथिल समाज रहिका मैथिली भाषा-भाषीजनक प्रसिद्ध संस्था अछि, जे पिछला पचास सालसँ मिथिला विभूति स्मृति पर्व समारोह आयोजित करैत आबि रहल अछि, संगहि संग अपन मातृभाषा मैथिली एवम मिथिलाक संरक्षण एवम संवर्धनक लेल आन्दोलन करैत रहल अछि, चाहे मैथिलीकेँ संवैधानिक अधिकारक लेल होय, मिथिलाक चौमुखी विकासक बात होय, ई संस्था संघर्ष कयलक अछि आ कय रहल अछि।
