‘मैथिल पुनर्जागरण प्रकाश फोरम’ कंपनीक कार्यालयक मधुबनीमे शुभारंभ

जनहित सेक्शन आठमे रजिस्टर्ड भेल अछि ई कंपनी
*
मधुबनी समदिया
*

बुध कऽ मधुबनीमे ‘मैथिल पुनर्जागरण प्रकाश फोरम’ कंपनीक कार्यालयक शुभारंभ भेल। प्रबंध निदेशक अजय नाथ झा सहित कार्यकर्ता लोकनि दीप प्रज्वलित कय एवं पूजनपूर्वक एकर विधिवत श्रीगणेश कयलनि।

कंपनीक बारेमे प्रारंभिक जानकारी दैत अजय नाथ झा शास्त्री कहलनि, ” ई सार्वजनिक हितक लेल आ सुदृढ़ परिणामकारक काजक लेल प्रस्तुत अछि सेक्सन आठमे रजिस्टर्ड “मैथिल पुनर्जागरण प्रकाश फोरम”, एकटा रजिस्टर्ड आर्गेनाइजेशन। इहो एकटा लीकसँ हटि कय किछु वास्तविक परिणामक लेल, बल्कि ई कहू की देशक अन्य संरक्षित क्षेत्रक संग मिथिला क्षेत्र सेहो वर्तमान परिप्रेक्ष्यमे डेगसँ डेग मिला कय चलि सकय तकर नींव राखय केर प्रयास अछि। ताहि केर लेल प्रायः प्रायः बहुत रास काज करय केर प्रावधान एहिमे समेटल गेल छैक, एकर मेमोरंडम विस्तृत छैक। ताहिमेसँ किछु काज एहि प्रकारसँ अछि :-
०१) दैनिक समाचार पत्र, पत्र-पत्रिका, रेडियो, पोडकास्ट, इन्टरनेट, टेलीकम्युनिकेशन, टेलीविजन चैनल, न्यूज चैनल, न्यूज पोर्टल, न्यूज पेपर एजेंसी, प्रकाशन, संपादन, लेखन, मूद्रण आ एहि सभसँ सम्बंधित सभ काज।
०२) लोकसभकेँ निःशुल्क सांस्कृतिक शिक्षा प्रदान करब।
०३) लोकसभकेँ मैथिली भाषा, मैथिली भाषाक लिपि, मैथिली संस्कृति केर निःशुल्क शिक्षा प्रदान करब।
०४) गरीब विद्यार्थी, बाल श्रमिक, विकलांग, अनाथ आदिकेँ शिक्षाक लेल आर्थिक सहयोग प्रदान करब।
०५) मैथिली भाषा लेखन आ वाचनक लेल निःशुल्क शिक्षा प्रदान करब।
०६) तत्संबंधी वैज्ञानिक शोध कार्यादिक लेल सहयोग करब।
आदि-आदि….”

शुभारंभ कार्यक्रममे संजय कुमार झा, कुन्दन आनंद झा, राकेश कुमार दास, इन्द्रदेव चौधरी आदि उपस्थित छलथि।