उत्तर प्रदेशक मुख्यमंत्री योगी आदित्यनाथ मंगलदिन विधानसभाकेँ सम्बोधित कयलनि। एहि दौरान ओ समाजवादी पार्टी (सपा) पर तीक्षण हमला कयलनि। ओ कहलनि जे सपाक लोक अपनाकेँ समाजवादी कहैत छथि, मुदा हुनकर राम मनोहर लोहियाक विचारसँ कोनो लेना-देना नहि अछि। सपा सदस्य लोहियाक आदर्श आ आचरणक परवाह नहि करैत छथि।
ओ कहलनि जे कुम्भ मेलाक भव्य आयोजन भारतक परम्पराक प्रति हमर सम्मानक एकटा उदाहरण अछि। एहि बेर कुम्भ मेलामे ६६.३ करोड़ लोक डुबकी लगओलनि। ई दुनियाक सबसँ पैघ आध्यात्मिक घटना भेल अछि। विश्व स्तर पर एकर प्रशंसा कएल जा रहल अछि। दुनिया भरिक मीडिया कहलक अछि जे एतेक पैघ आयोजन कोनो चमत्कारसँ कम नहि अछि। कुम्भ मेलाक आयोजन हमरा सभक लेल अग्निपरीक्षा छल। केन्द्र आ राज्य दुनू सरकार नीक प्रदर्शन कयलक। एहि आयोजनक सफलता बहुत दिन धरि दुनिया भरिमे गूंजैत रहत। ई हमर सनातन धर्मक लेल गर्वक विषय अछि।
योगी उल्लेख कयलनि जे ई मात्र एकटा आध्यात्मिक उपलब्धि नहि अछि अपितु एहि आयोजनसँ हमर अर्थव्यवस्थाकेँ ३५ ट्रिलियन टाकाक लाभ होयबाक आशा अछि।
कुम्भ मेलाक आर्थिक पहलूक वर्णन करैत सीएम योगी कहलनि जे समाजवादी पार्टी नाविकक शोषणक मुद्दा उठबैत अछि। कुम्भ मेलाक ४५ दिनक अवधिमे एकटा नाविक २३ लाख टाकाक कमाई कयलक। एकर अर्थ अछि जे ओहि नाविकक दैनिक आय लगभग ५०,००० रुपैया छल। तहिना विभिन्न व्यवसायसँ जुड़ल आन लोकसभकेँ सेहो लाभ भेल।
समाजवादी पार्टी पर हमला करैत ओ कहलनि जे सपा केर नकारात्मक दुष्प्रचार’क बावजूद लोकक विश्वास नहि डगमगा सकल। राज्यक प्रत्येक गाम कुम्भ मेलासँ जुड़ल छल। सनातनक प्रति एहि रवैयाक कारणेँ सपाकेँ पहिने पराजयक सामना करय पड़ल आ २०२७क चुनावमे सेहो ओकरा करारी पराजयक सामना करय पड़त।
