जयंती पर लोकप्रिय नेताकेँ देलनि भावपूर्ण श्रद्धांजलि
*
दरभंगा समदिया
*
मिथिलाक बेटा, देशक नेता, अर्थशास्त्रक प्रणेता आ स्वतंत्रता आन्दोलनक अग्रणी सिपाही शहीद ललित नारायण मिश्रक कृतित्व आ व्यक्तित्वक प्रभाव मिथिलासँ लऽ कऽ देश- विदेशमे पसरल छल। ई गप्प विद्यापति सेवा संस्थानक महासचिव डॉ बैद्यनाथ चौधरी बैजू शुक्रदिन विद्यापति सेवा संस्थानक तत्वावधानमे आयोजित ललित जयंती समारोहमे कहलनि। मौका पर डाॅ बैजू ललित नारायण मिश्रकेँ भारत रत्नसँ सम्मानित कयल जयबाक जोरदार मांग एक बेर फेर उठौलनि। एकरा संगहि ओ समस्तीपुर स्टेशनक नामकरण ललित बाबू केर नाम पर करबा, समस्तीपुर स्टेशन पर जाहि स्थान पर हुनका बम लागल छल, ओतय हुनकर आदमकद प्रतिमा स्थापित कयल जयबा, ललित नारायण मिथिला विश्वविद्यालयमे विद्यापति चेयर आ कर्पूरी ठाकुर चेयर केर समुचित क्रियान्वयन सहित ललित नारायण मिश्र चेयर केर स्थापना कयल जयबाक मांग विद्यापति सेवा संस्थान दिससँ रखलनि। जकर उपस्थित लोक ध्वनिमतसँ समर्थन कयलनि।
जयंती समारोहक अध्यक्षता करैत एमएमटीएम काॅलेजक प्रधानाचार्य डा उदय कांत मिश्र कहलनि जे ललित बाबू जाति व धर्मक राजनीतिसँ बहुत बेसी ऊपर छलाह। तें ओ जन जनमे नहि सिर्फ लोकप्रिय छलाह, अपितु अपना समयमे सर्वमान्य नेता केर रूपमे प्रतिष्ठित सेहो भेलाह। विद्यापति सेवा संस्थानक मीडिया संयोजक प्रवीण कुमार झा अपन विचार रखैत ललित बाबू केर हत्याक करीब पचास साल बीत गेलाक बादो हुनकर हत्या केर रहस्यसँ पर्दा नहिं उठि सकबा पर सवाल उठौलनि। ओ कहलनि जे एतेक नम्हर समय बीति गेलाक बादो मिथिला केर एहि दुखद आ संवेदनशील राजनीतिक हत्याकें एखनहु रहस्य बनल रहब चिंता आ निन्दा केर विषय अछि। ओ लोकतंत्रमे जनशक्तिकेँ महाशक्ति बतबैत एहि रहस्यसँ पर्दा उठयबा लेल अपन आवाज बुलंद करबाक आह्वान कयलनि।
डा राजकिशोर झा ललित बाबू केर द्वारा विभिन्न मंत्रालयमे देल गेल योगदान सहित मिथिला, बिहार व देश केर विकासक लेल कयल गेल हुनक महत्वपूर्ण कार्यक विस्तारसँ चर्चा कयलनि। हरिकिशोर चौधरी ‘मामा’ भारत रत्न सम्मान पयबाक ललित बाबूकेँ वाजिब हकदार करार देलनि। प्रो चन्द्र शेखर झा बूढाभाई कहलनि जे ललित बाबू भारतीय राजनीतिमे साफ-सुथरा छवि बला कद्दावर नेता रहथि, जिनका राजनीतिमे अनबाक श्रेय बिहारक पहिल मुख्यमंत्री डॉ श्रीकृष्ण सिंह कें जाइत छनि।
समारोहमे डाॅ गणेश कांत झा, डॉ चन्द्रमोहन झा पड़वा, दुर्गा नन्द झा, पंकज झा, आशीष चौधरी, चन्दन सिंह, नवल किशोर झा, राजन झा आदि सेहो श्रद्धा सुमन अर्पित कयलनि। कार्यक्रममे ललित बाबू संग शहीद भेल तत्कालीन एमएलसी सर्व नारायण झा केर प्रति सेहो संवेदना प्रकट कयल गेल।
