प्रधानमंत्री नरेन्द्र मोदी स्वीकार कयलनि अछि जे लखपति दीदी स्व-सहायता समूहक माध्यमसँ राष्ट्र निर्माणमे अपन भागीदारी सुनिश्चित कऽ रहल छथि। ओ कहलनि जे पिछला १० सालसँ महिला कल्याण लेल अभूतपूर्व कार्य कयल जा रहल अछि जाहिसँ देशक महिला आगू बढ़ि सकय, समृद्ध बनि सकय आ प्रगतिक नव आयाम स्थापित कऽ सकय। ई जानकारी प्रधानमंत्री कार्यालय द्वारा आइ एकटा वक्तव्यमे जारी कयल गेल।
केन्द्रीय कृषि आ किसान कल्याण मंत्री शिवराज सिंह चौहान द्वारा एक्स परक पोस्ट पर टिप्पणी करैत प्रधानमंत्री कार्यालय लिखलक, “केन्द्रीय मंत्री श्री @ChouhanShivraj जी लिखैत छथि जे लखपति दीदियां स्व-सहायता समूहक माध्यमसँ राष्ट्र निर्माणमे अपन भागीदारी सुनिश्चित कऽ रहल छथि। महिला कल्याणक अभूतपूर्व कार्य पिछला १० सालसँ कयल जा रहल अछि जाहिसँ देशक महिला आगू बढ़ि सकय, समृद्ध आ संपन्न बनि सकय आ प्रगतिक नव आयाम स्थापित कऽ सकय। महिलाक शैक्षिक, सामाजिक, आर्थिक आ राजनीतिक सशक्तिकरण केर सुनिश्चित कयल गेल अछि।”
वास्तवमे केन्द्रीय कृषि मंत्री शिवराज सिंह चौहान अपन सोशल मीडिया हैंडल एक्स पर एकटा पोस्टमे अपन लेख साझा करैत लिखने छथि जे लखपति दीदी प्रधानमंत्री नरेन्द्र मोदीके नेतृत्व आ मार्गदर्शनमे सामाजिक परिवर्तनक संवाहक छथि। पीएमओ शिवराज सिंहक लेख पर अपन टिप्पणी कयलक, आ कहलक जे पीएम मोदी स्वीकार कयलनि अछि जे लखपति दीदी स्व-सहायता समूहक माध्यमसँ राष्ट्र निर्माणमे अपन भागीदारी सुनिश्चित कऽ रहल छथि।
जनतब जे प्रधानमंत्री मोदी २५ अगस्तकेँ महाराष्ट्रक जलगांवमे लखपति दीदी सम्मेलनमे शामिल भेलाह। जतय ओ हालहिमे ११ लाख नव लखपति बहिनकेँ प्रमाणपत्र देलनि जे वर्तमान सरकारक तेसर कार्यकालमे लखपति बनि गेलीह। एहि दौरान ओ देश भरिक लखपति बहिनसभसँ सेहो बातचीत कयलनि। एहि अवसर पर प्रधानमंत्री मोदी २५०० करोड़ टाकाक रिवाॅल्विंग फंड जारी कयलनि जाहिसँ ४.३ लाख स्व-सहायता समूह (एसएचजी)क लगभग ४८ लाख सदस्यकेँ लाभ भेटत। एकर अतिरिक्त प्रधानमंत्री ५,००० करोड़ टाकाक बैंक ऋण सेहो वितरित कयने छलाह। एहि अवसर पर प्रधानमंत्री कहने छलाह जे एतय उपस्थित प्रत्येक महिला जनैत छथि जे जखन ओ रोजी-रोटी कमाबय लगैत छथि तखन समाजमे हुनक स्थिति नीक होइत अछि। ओ कहलनि जे जेना-जेना आमदनी बढ़ैत जाइत अछि, परिवारक क्रय शक्ति सेहो बढ़ैत जाइत अछि। ओ इहो कहलनि, “जखन एकटा बहिन लखपति दीदी बनि जाइत अछि तखन पूरा परिवारक भाग्य बदलि जाइत अछि।”
जानकारी जे पिछला साल केंद्र सरकार महिला लेल लखपति दीदी योजना शुरू कयलक। एहि योजनाक उद्देश्य उद्योगक क्षेत्रमे महिलासभकेँ बढ़ावा देनाइ, उद्योग स्थापित करबाक लेल हुनका वित्तीय सहायता देनाइ अछि। एहि योजनाक अन्तर्गत केन्द्र सरकार महिलासभकेँ बिना ब्याजक ५ लाख रुपया धरि ऋण प्रदान करैत अछि। लखपति दीदी योजनाक शुरुआतक बादसँ एक करोड़ महिलाकेँ लखपति दीदी बनायल जा चुकल अछि आ सरकार तीन करोड़ लखपति दीदीक लक्ष्य रखलक अछि।
