मिथिला क्षेत्रीय बिहारक लखीसराय पुलिस साइबर ठग गिरोहक तीनटा अपराधीकेँ गिरफ्तार कयलक अछि। ई अपराधी सभ किराया पर सीएससी खाता लेने छल आ एहिसँ ओ करोड़ो टाकाक लेन-देन करैत छल। एतबे नहि, आरोपी सभ विभिन्न परीक्षामे सेटिंग सेहो कराबैत छल।
पुलिस कहलक जे गाममे सीएससी (कॉमन सर्विस सेंटर) चलयवला एकटा व्यक्ति साइबर ठगक सङ्ग मिलीभगत कऽ अपन खाता किरायापर दैत अछि। एतबे नहि, पुलिस कहलक जे आरोपी अलग-अलग परीक्षामे सेटिंग करय केर काज सेहो करैत अछि। साइबर ठगक ई पूरा गिरोह आब पुलिसक हिरासतमे अछि आ एहि मामिलामे आगूक जाँच कयल जा रहल अछि। आरोपी सीएससीक खातासँ करोड़ो रुपयाक लेनदेन सेहो करैत छल।
ठग लग शैक्षणिक प्रमाणपत्र आ बैंक पासबुक अछि
पुलिस तीनटा आरोपीकेँ गिरफ्तार कयलक अछि आ हुनकालोकनिसँ एकटा लैपटॉप, प्रिंटर, स्कैनर, भारी मात्रामे शैक्षणिक प्रमाणपत्र सहित दर्जनाधिक बैंक पासबुक, चेकबुक आ एटीएम कार्ड बरामद कयलक अछि।
गिरफ्तार कयल गेल तीनू अपराधीक पहिचान लखीसराय जिलाक निवासी नीतीश कुमार, नालंदाक निवासी राज किरण आ नीतीश पटेलक रूपमे भेल अछि। राज किरण आ नीतीश पटेल नालंदाक बेन प्रखंडमे कार्यपालक सहायकक पद पर काज कऽ रहल अछि।
लखीसराय केर एसपी पंकज कुमार कहलनि कि पुलिसकेँ सूचना भेटल छल जे बड़हियाक ज्वाॅस निवासी नीतीश कुमार अपन गाममे सीएससी चलाबैत अछि आ साइबर ठगक संग मिलीभगतसँ अपन सीएससी खाता किराया पर दैत अछि, जाहि कारणेँ पैसाक पैघ पैमाना पर लेनदेन होइत अछि। एहि सूचना पर प्रशिक्षण डीएसपी आकाश किशोरक नेतृत्वमे छापा मारल गेल आ तीनू अपराधीकेँ गिरफ्तार कऽ लेल गेल। पूछताछक दौरान नीतीश कुमार खुलासा कयलक कि ओ अपन सहयोगी राज कुमार किरणकेँ सीएससी लिंक, आईडी आ पासवर्ड किराया पर देने छल। ओकर बाद एक दिनमे खातासँ लगभग डेढ़ करोड़क लेनदेन भेल छल।
एतबे नहिं, पुलिस पूछताछमे इहो पता चलल अछि जे गिरफ्तार आरोपीमे सँ एक नीतीश पटेल बीपीएससी शिक्षक सहित अलग-अलग परीक्षामे सेटिंग केर काज सेहो करबैत छल। पुलिस सभ आरोपीसँ पुछताछ कय रहल अछि आ एही आधार पर आगुक कारवाई होयत।
