तेजस्वी यादवकेँ सीएम उम्मीदवारी पर कांग्रेस प्रभारी कृष्णा अल्लावरु केर बयानक विरोध अपनहिं दलमे शुरू भ’ गेल अछि। हुनके दलक विधायक हुनक बयान पर टिप्पणी कयलनि।
बिहार विधानसभा चुनावक लेल तमाम दल सभ अपन-अपन तरिकासँ तैयारिमे जुटल छथि। महागठबंधनक अंदर सेहो दल सभक बीच तालमेलक प्रयास कएल जा रहल अछि। कांग्रेस मजबूतीसँ बिहारक चुनावमे उतरय चाहैत अछि, ई कमसँ कम एखनि धरि आरजेडीक सामने कमजोर नहि पड़य चाहैत अछि। एकर कारण अछि जे पार्टी आलाकमान किछु महत्वपूर्ण आ ठोस निर्णय लेलक अछि।
महागठंधनमे आब सीएम फेस पर सेहो चर्चाक शुरुआत भ’ गेल अछि। हालाँकि, ई पहिनहि निश्चित अछि जे महागठंधनक सीएम फेस तेजस्वी यादव छथि, तकर बादो बिहार कांग्रेस प्रभारी कृष्णा अल्लावरु सीएम फेस पर विचार करबाक बात कहि गठबन्धनमे नव विवाद उत्पन्न कएलनि।
मुदा बिहारमे कांग्रेस प्रभारी कृष्णा अल्लावरुक बयानक विरोध शुरू भेल अछि। स्वयं हुनके पार्टीक विधायक हुनक बयान पर टिप्पणी कयलनि। बिहार कांग्रेस प्रभारीक बयानक विरोध करैत कांग्रेस विधायक मुन्ना तिवारी कहलनि, “पहिनेसँ तय भ’ गेल अछि जे तेजस्वी यादव महागठबंधनक मुख्यमंत्रीक चेहरा छथि। एहिमे कुनू दुविधा नहि होयबाक चाही”।
त’ की आब ई मानि लेल जाय कि बिहार कांग्रेसक बहुतेक नेता अपन पार्टीक आलाकमान आ बड़का नेता सभक बयान आ फैसलासँ असहमत छथि वा असहज अनुभव क’ रहल छथि। कारण महागठबंधनक समस्त नेता पहिनेसँ एहि बात पर सहमत छथि जे बिहारमे सरकार बनल त’ तेजस्वी यादव मुख्यमंत्री होएत।
दरअसल दिल्लीमे कांग्रेसक राष्ट्रीय अध्यक्ष मल्लिकार्जुन खरगे आ लोकसभामे नेता प्रतिपक्ष राहुल गांधी पार्टीक प्रदेश अध्यक्ष आ प्रभारी संग बैसार कएलनि। बैसारक बाद बिहार कांग्रेसक प्रभारी कृष्णा अल्लावरु कहलनि, “हम मिलिजुलि क’ बीजेपी आ हुनकर सहयोगी दल सभक सामना करब। “ताहि संगहि बिहार प्रदेश कांग्रेसक अध्यक्ष राजेश राम कहलनि, “हमर मुकाबला बीजेपीसँ अछि। बैठकमे संगठनकेँ मजबूत करबाक आ चुनाव प्रचारकेँ ल’ क’ चर्चा भेल अछि। गठबंधन केँ ल’ क’ कुनू कन्फ्यूजन नहि अछि। बिहारमे इंडिया गठबंधनक स्वरूप बनल रहत।
जनतब जे एक प्रश्नक उत्तरमे प्रभारी कृष्णा अल्लावरु तेजस्वीक सीएम उम्मीदवारी पर कहलनि जे जखनि बैसार होएत तँ तय होएत कि सीएम के होयत ? सीएमक घोषणा करबाक छैक कि नहि ? एखनि किछु कहब उचित नहि होएत ?
