‘जम्मू-कश्मीर भारतक महत्वपूर्ण हिस्सा’ : अमेरिकी राजदूतक पैघ बयान

नई दिल्ली । समदिया

जम्मू-कश्मीर यात्राक क्रममे भारतमे अमेरिकाक राजदूत सर्जियो गोर श्रीनगरमे मुख्यमंत्री उमर अब्दुल्लासँ भेंट कयलनि। एहि दौरान जम्मू-कश्मीरक सुरक्षा स्थिति, पर्यटन, आपसी सहयोग आ अमेरिकाक यात्रा चेतावनी (ट्रैवल एडवाइजरी) सहित विभिन्न विषय पर चर्चा भेल। भेंटक बाद गोरक बयान विशेष रूपसँ चर्चामे अछि, जतऽ ओ स्पष्ट रूपसँ कहलनि जे जम्मू-कश्मीर भारतक एकटा महत्वपूर्ण हिस्सा अछि।

सर्जियो गोर कहलनि जे अमेरिका समय-समय पर अपन यात्रा चेतावनीक समीक्षा करैत अछि। ओ कहलनि जे एखनहि कोनो पैघ घोषणा नहि कऽ सकैत छथि, मुदा जम्मू-कश्मीरक लेल जारी यात्रा चेतावनी पर अमेरिका फेर विचार करत। हुनका अनुसार भारत सरकार जम्मू-कश्मीरकेँ सुरक्षित बनेबाक दिशामे उल्लेखनीय कदम उठौने अछि, आ एहि आधार पर अमेरिका ई विचार करत जे यात्रा चेतावनीकेँ कम कएल जाए वा नहि।

अमेरिकी राजदूत जम्मू-कश्मीरक प्राकृतिक सुंदरताक सेहो प्रशंसा कयलनि। ओ कहलनि जे ई क्षेत्र अत्यन्त सुंदर अछि आ हुनका विश्वास अछि जे अनेक अमेरिकी नागरिक एतय आबि कऽ प्राकृतिक सुंदरताक संगहि पर्यटन, व्यापार आ अन्य अवसरक अनुभव करऽ चाहत।

 

उमर अब्दुल्ला कहलनि – बैठक बहुत सकारात्मक रहल

सर्जियो गोरसँ भेंटक बाद मुख्यमंत्री उमर अब्दुल्ला कहलनि जे बैठक बहुत नीक आ सकारात्मक रहल। दुनू पक्ष भारत-अमेरिका संबंधक संगहि विशेष रूपसँ एहि बात पर चर्चा कयलक जे अमेरिका जम्मू-कश्मीरक विकास आ प्रगतिक लेल कोन-कोन क्षेत्रमे सहयोग कऽ सकैत अछि।

मुख्यमंत्री कहलनि जे किछु पुरान मुद्दा अछि, जकरा समयक संग सुलझेबाक प्रयास कएल जाएत। ओ आगुओ एहि विषय पर बातचीत जारी रहबाक आशा व्यक्त कयलनि। उमर अब्दुल्ला कहलनि जे एक दिसि सर्जियो गोर आ अमेरिकी पक्षक संग बातचीत आगू बढ़त, दोसर दिसि ओ स्वयं नई दिल्लीमे भारत सरकारक संग एहि विषय पर समन्वय करैत रहताह।

ओ उम्मीद जतौलनि जे आगू आबयवला वर्षसभमे अमेरिका आ जम्मू-कश्मीरक बीच संपर्क, सहयोग आ साझेदारी बढ़त एवं ई संबंध आरो मजबूत होएत।

पाकिस्तानक कूटनीतिक नैरेटिवकेँ पैघ झटका

अमेरिकी राजदूतक एहि बयानकेँ जम्मू-कश्मीरक सुरक्षा आ अंतरराष्ट्रीय छविक दृष्टिसँ महत्वपूर्ण मानल जा रहल अछि। पाकिस्तान दीर्घ समयसँ अंतरराष्ट्रीय मंचसभ पर जम्मू-कश्मीरमे सुरक्षा स्थिति आ मानवाधिकारक मुद्दाकेँ लऽ कऽ भारतक विरुद्ध नकारात्मक वातावरण बनेबाक प्रयास करैत रहल अछि।

एहेन स्थितिमे अमेरिकाक दिसिसँ जम्मू-कश्मीरमे सुरक्षा स्थितिमे सुधारक उल्लेख करब आ यात्रा चेतावनीमे राहत देबाक संकेत देब पाकिस्तानक कूटनीतिक नैरेटिवकेँ पैघ धक्का मानल जा रहल अछि। अमेरिका एहेन वैश्विक प्रभाववला देशक सकारात्मक दृष्टिकोणसँ भारतक ई पक्ष मजबूत होइत अछि जे जम्मू-कश्मीर क्रमशः सुरक्षित, विकसित आ पर्यटनक लेल अनुकूल क्षेत्र बनि रहल अछि।

क्षेत्रीय प्रभाव आ पाकिस्तानक बढ़ैत अंतरराष्ट्रीय चुनौती

जम्मू-कश्मीरक सुरक्षा आ विकासक संबंधमे वैश्विक स्तर पर बदलैत धारणा पाकिस्तानक लेल कूटनीतिक चुनौतीक रूपमे देखल जा रहल अछि। भारतक रुखकेँ अंतरराष्ट्रीय स्तर पर मजबूती भेटबाक संगहि जम्मू-कश्मीरमे विदेशी निवेश, पर्यटन आ आर्थिक सहयोगक संभावना सेहो बढ़ि सकैत अछि।

विश्लेषकसभक मानब अछि जे अंतरराष्ट्रीय समुदाय जम्मू-कश्मीरकेँ भारतक विकास यात्राक महत्वपूर्ण हिस्साक रूपमे देखबाक दिशामे आगू बढ़ि रहल अछि। एहेनमे अमेरिकाक सकारात्मक संकेतसँ क्षेत्रक वैश्विक छवि आरो मजबूत होएबाक संभावना अछि, जकर सीधा लाभ पर्यटन, निवेश आ अंतरराष्ट्रीय संपर्ककेँ भेटि सकैत अछि।