संयुक्त अरब अमीरात (यूएई) आ ओमानमे आएल तुफानसँ रिकॉर्ड बरखा भेल। जाहिसँ एतय स्थिति बदसँ बदतर भऽ गेल अछि। पूरा शहर जलसँ भरि गेल अछि। यातायात ठप भऽ गेल आ लोक अपन घरमे फँसि गेल। एतबे नहि, दुबईसँ दिल्ली लेल कतेको उड़ान रद्द करय पड़ल। एम्हर संयुक्त अरब अमीरातमे भारतक महावाणिज्य दूतावास दुबई अन्तर्राष्ट्रीय हवाई अड्डासँ आबय/जायवला भारतीय यात्रीसभकेँ सलाह देलक अछि जे जाबत स्थिति सामान्य नहि भऽ जायत ताबत धरि यात्रासँ बचबाक चाही।
एहि सप्ताह रिकॉर्ड बरखाक बाद दुबई आ लगपासक क्षेत्रमे बाढ़ि आबि गेल । एहिठामक लोक एहिसँ उबरबाक प्रयास कए रहल छथि। शुक्रदिन जारी एकटा परामर्शमे दूतावास कहलक जे अधिकारी परिचालन सामान्य करबाक लेल चौबीसों घंटा काज कऽ रहल छथि। हवाई अड्डा अधिकारीसभ यात्रीसभकेँ सलाह देलनि अछि जे उड़ानक समयक विषयमे सम्बन्धित एयरलाइन्ससँ पुष्टि भेटलाक बादे हवाई अड्डा पर आबी। दूतावास कहलक “एहि सप्ताहक आरम्भमे संयुक्त अरब अमीरातमे भारी बरखाक कारण कतेको ठाम बाढ़ि आबि गेल छल। स्थितिक कारण दुबई अन्तर्राष्ट्रीय हवाई अड्डा अस्थायी रूपसँ आबयवला उड़ानक संख्या सीमित कऽ देलक।”
दुनियाक सबसँ व्यस्त हवाई अड्डा दुबई अन्तर्राष्ट्रीय हवाई अड्डा २४ घंटाक भीतर सामान्य होयबाक आशा अछि। “दुबई अन्तर्राष्ट्रीय हवाई अड्डासँ यात्रा करयवला भारतीय यात्रीसभकेँ यात्रासँ बचबाक सलाह देल जाइत अछि। गैर-आवश्यक यात्राकेँ फेरसँ निर्धारित करबाक सेहो सलाह देल गेल अछि।”
भारतक महावाणिज्य दूतावास ईहो सूचित कयलक जे ओतय रहनिहार भारतीय मौसम संबंधी आपात स्थितिक लेल +971501205172, +971569950590, +971507347676, आ +971585754213 सम्पर्क कऽ सकैत छथि।
