भारत रक्षा क्षेत्रमे रिकॉर्ड सफलता प्राप्त कयलक अछि। भारतक निर्यात एहि क्षेत्रमे रिकॉर्ड उच्च स्तरकेँ छू गेल अछि। ई जानकारी केंद्रीय रक्षा मंत्री राजनाथ सिंह सोशल मीडिया प्लेटफॉर्म एक्स पर देलनि।
राजनाथ सिंह अपन एक्स पोस्टमे लिखलनि कि सभ भारतीयकेँ ई बताबैत प्रसन्नता भऽ रहल अछि जे भारतीय रक्षा निर्यात अभूतपूर्व ऊँचाइ पर पहुँचल अछि आ स्वतंत्र भारतक इतिहासमे पहिल बेर २१,००० करोड़ टाकाक आंकड़ा पार कयलक अछि। वित्तीय वर्ष २०२३-२४ मे भारतक रक्षा निर्यात बढ़ि कऽ २१,०८३ करोड़ टाकाक रिकॉर्ड स्तर पर पहुँचि गेल अछि, जे पछिला वित्तीय वर्षक तुलनामे ३२.५ प्रतिशतक उल्लेखनीय वृद्धि अछि।
रक्षा मंत्री आगू लिखलनि “प्रधानमंत्री श्री नरेन्द्र मोदीक दूरदर्शी नेतृत्वमे रक्षा मंत्रालय भारतक डिफेंस मैन्युफैक्चरिंग आ निर्यातकेँ बढ़ावा देबाक लेल कतेको कदम उठौलक अछि। एहि लेल निजी क्षेत्र आ डीपीएसयू सहित हमर रक्षा उद्योग पछिला किछु सालमे नीक प्रदर्शन कयलक अछि।”
रक्षा मंत्री एहि उपलब्धिकेँ प्राप्त करय लेल रक्षा निर्यात क्षेत्रक सब हितधारककेँ शुभकामना सेहो देलनि।
प्रधानमंत्री नरेन्द्र मोदी सरकारक गठनक बादसँ सभ क्षेत्रमे आत्मनिर्भरता प्राप्त करबा पर जोर देने छलाह। एकर सङ्गहि पीएम मोदीक रक्षा क्षेत्रपर सदैव विशेष ध्यान रहल अछि। एहन स्थितिमे रक्षा क्षेत्रक एहि उपलब्धिकेँ आत्मनिर्भर भारतक हुनक दृष्टिकोणसँ जोड़ल जा रहल अछि।
