केजरीवालक गिरफ्तारीक विरोधमे ‘इंडिया’ गठबंधनक नेता रामलीला मैदानमे जमा

दिल्ली
*

शराब नीति मामिलामे दिल्लीक मुख्यमंत्री अरविन्द केजरीवालक गिरफ्तारीक विरोधमे विपक्षी नेता लोकनि रविदिन राष्ट्रीय राजधानीक रामलीला मैदानमे विरोध रैली कयलनि। सीएम केजरीवालक पत्नी सहित अन्य नेता भाजपा पर निशाना साधलनि।

अरविन्द केजरीवालक पत्नी सुनीता केजरीवाल कहलनि, “मोदी जी हमर पतिकेँ जेलमे राखि देलनि, की प्रधानमंत्री सही काज कयलनि ? की अहाँकेँ लगैत अछि जे केजरीवाल सच्चा देशभक्त आ ईमानदार व्यक्ति छथि ? की केजरीवालजीकेँ इस्तीफा देबाक चाही ? अहांक केजरीवाल शेर छथि, अहां बेसी दिन हुनका जेलमे नहिं राखि पायब।”

ओ कहलनि “जँ अहाँ सभ इंडिया गठबंधनकेँ मौका देब तऽ हम सब मिलि कऽ एहेन महान राष्ट्रक निर्माण करब, मात्र नाममे इंडिया नहिं अछि, बल्कि दिलमे इंडिया अछि। हम (अरविन्द केजरीवाल) इंडिया गठबंधनक तरफसँ १४० करोड़ भारतीयकेँ 6 टा गारंटी दैत छी।” सुनीता केजरीवाल कहलनि, “पहिल – पूरा देशमे ३४ घंटा बिजलीक व्यवस्था करब, दोसर पूरा देशक गरीबक लेल मुफ्त बिजली, तेसर – हर गाममे उत्कृष्ट सरकारी स्कूल बनायब, चारिम – हर गाममे मोहल्ला क्लीनिक बनायब, मुफ्त इलाजक व्यवस्था करब, पांचम- किसानकेँ स्वामीनाथन आयोगक अनुसार एमएसपी पर फसलक दाम भेटत। छठम, हम दिल्लीकेँ जनताकेँ ओकर अधिकार देब, दिल्लीकेँ पूर्ण राज्यक दर्जा देब। ई घोषणा करबासँ पहिने हम इंडिया गठबन्धनक सहयोगी दलसँ हुनक अनुमति नहिं लेलहुँ मुदा आशा करैत छी जे कियो एहि पर आपत्ति नहिं करत। हम अगिला पांच सालमे एहि गारंटी केर पूरा करब।”

बिहारक पूर्व उपमुख्यमंत्री आ राजद नेता तेजस्वी यादव कहलनि, “हमसभ पहिल रैली पटनामे, दोसर मुम्बईमे आ तेसर दिल्लीमे कयलहुँ। देशक कोन-कोनमे हम कतहु जा रहल छी, जनमानसक सहयोग भेटि रहल अछि। जाहि अनुसार देशक बंटवाराक काज कएल जा रहल अछि। नफरतक राजनीति कयल जा रहल अछि। हम चाहैत छी जे एहि लड़ाईमे हमरा अहांक संग भेटय। जे नारा लगबैत छथि जे ‘अबकी बार ४०० के पार,’ ओकर मुँह अछि, ओ किछु कहत, मुदा एकटा बात निश्चित अछि जे जनता मालिक अछि।”
आगू ओ कहलनि “ओ (भाजपा) नारा लगा रहल अछि, तेँ बुझाइत अछि जे ईवीएम पहिनेसँ सेट भऽ चुकल अछि। देशमे अघोषित आपातकाल लागू कऽ देल गेल अछि। जँ देशमे कोनो पैघ दुश्मन अछि तऽ ओ अछि बेरोजगारी, महंगाई आ गरीबी। प्रधानमंत्री मोदी कोनो नौकरी नहिं देलखिन, सब चीज केर निजीकरण केलखिन। हम १७ महीनामे बिहारमे ५ लाख रोजगारक सृजनक काज करलहुँ। आइ किसान तबाह भऽ गेल अछि, युवा परेशान अछि मुदा प्रधानमंत्री मोदी लग किसानसभसँ भेंट करबाक समय नहिं अछि। मोदी जी भेँट प्रियंका चोपड़ासँ भेंट करताह , मुदा किसानसँ नहि।”

महाराष्ट्रक पूर्व मुख्यमंत्री आ शिवसेना प्रमुख उद्धव ठाकरे कल्पना सोरेन आ सुनीता केजरीवालकेँ कहलनि, “चिन्ता नहिं करू, मात्र हम नहिं बल्कि पूरा देश अहाँक सङ्ग अछि। किछु दिन पहिने तक मात्र आशंका छल जे की हमर देश तानाशाही दिसि बढ़ि रहल अछि ? मुदा आब ई आशंका नहिं बल्कि, वास्तविकता अछि। भाजपा सोचने होयत जे अरविन्द केजरीवाल आ हेमंत सोरेनकेँ गिरफ्तार करबासँ लोक भयभीत होयत, मुदा ओ अपन देशवासीकेँ कहियो पहिचानलक नहिं। हमर भारतमे कियो डरय वाला नहिं अछि, सभ लड़यवाला अछि। आओर जँ अहां (भाजपा) मे हिम्मत अछि तखन हम भाजपा केर चुनौती दैत छी जे बाकी सब केर छोड़ि अपन बैनर पर लगाउ जे भाजपा लग जे पार्टी अछि, ओ ईडी, सीबीआई आ आईटी अछि।”

नेकां प्रमुख फारूक अब्दुल्ला कहलनि, “आइ हमर उद्देश्य मात्र एक अछि जे हम सभ संविधानकेँ बचाबी। आदमीकेँ- आदमीसँ लड़ायल जा रहल अछि। ओ सभ नेता जे आइ कैद भए गेल छथि। ओ तखने बाहर आबि सकैत छथि जखनि अहाँ ई आईन पकड़ब आ चुनावक समय आयत, अहाँकेँ वोट देबय पड़त। अहाँ ओ बटन दबाबू जे एहि शासनकेँ हराएत। हमरा सभकेँ मिलि इंडिया गठबंधन केर मजबूत करय केर अछि।”

पीडीपी प्रमुख महबूबा मुफ्ती कहलनि, “आइ देश बहुत कठिन परिस्थितिसँ गुजरि रहल अछि। एहेन हाल अछि, कोनो वकील नहिं, कोनो दलील नहिं, कोनो कार्रवाई नहिं, सीधा जेल। भरिसक कलयुगक अमृतकाल एकरे कहल जाइत अछि जे अहाँ बिना किछु पूछने लोककेँ जेलमे डालि दियौक। हम अहाँक निर्वाचित प्रतिनिधिक बात कए रहल छी जिनका अहाँ वोट दऽ विधायक, सांसद, मुख्यमंत्री, मंत्री बनबैत छी। हुनका पर केना भ्रष्टाचारक आरोप लगा बिना कोनो वकालत आ कार्रवाईक जेलमे डालल जाइत अछि। जम्मू-कश्मीरमे पछिला पाँच सालसँ हम इएह देखैत आबि रहल छी। जखन अहाँ संविधान आ कानूनक उल्लंघन करैत छी तखन ई राष्ट्रीय हितमे नहिं होइत अछि, बल्कि ई देशद्रोह अछि। केजरीवाल आ हेमंत सोरेनक की दोष अछि ?”

झारखंड मुक्ति मोर्चा (झामुमो)क नेता आ पूर्व मुख्यमंत्री हेमंत सोरेनक पत्नी कल्पना सोरेन कहलनि, “आइ एतय उमड़ल जनसैलाब एहि बातक गवाही दैत अछि जे ई सभा आइ लोकतंत्रकेँ समाप्त करबाक लेल तानाशाही शक्तिसभ द्वारा अपन डेग उठयबाक तरीकाकेँ समाप्त करबाक लेल आयोजित कयल गेल अछि। आइ भारतमे बाबा साहेबक संविधान द्वारा देल गेल गारंटीकेँ एनडीए सरकार द्वारा समाप्त कयल जा रहल अछि। ओ सभ हमर संवैधानिक मूल्य के तोड़ि देलखिन। अहां (लोक) केँ अपन वोटक चयन ठीकसँ करबाक अछि।”

रैलीमे कांग्रेस अध्यक्ष मल्लिकार्जुन खड़गे, कांग्रेस नेता राहुल गांधी, प्रियंका गांधी, समाजवादी पार्टी प्रमुख अखिलेश यादव, महाराष्ट्रक पूर्व मुख्यमंत्री उद्धव ठाकरे, राष्ट्रवादी कांग्रेस पार्टी (एससीपी) प्रमुख शरद पवार, दिल्लीक मुख्यमंत्री अरविंद केजरीवालक पत्नी सुनीता केजरीवाल आ झारखंडक पूर्व मुख्यमंत्री हेमंत सोरेनक पत्नी कल्पना सोरेन आदि उपस्थित छलैथ।