डॉ एनसी कॉलेज बेनीपट्टीक संस्थापक शिक्षाविद पूर्व विधान पार्षद स्व.डॉ नीलांबर चौधरीक ९०म जयंती समारोहक उद्घाटन बिहार सरकारकेँ समाज कल्याण मंत्री मदन सहनी केलैन्ह
*
मधुबनी समदिया
*
बेनीपट्टी नगर पंचायत अवस्थित डॉ एनसी कॉलेजमे महाविद्यालयक संस्थापक सह शिक्षाविद पूर्व विधान पार्षद डॉ स्व. नीलांबर चौधरीकेँ ९०म जयंती समारोह पूर्वक मनाओल गेल। एहि कार्यक्रमक उद्घाटन बिहार सरकारक समाज कल्याण मंत्री मदन सहनी, कॉलेजक अध्यक्ष सह पूर्व विधान पार्षद डॉ दिलीप कुमार चौधरी, भाकपा राज्य परिषद सदस्य कृपानंद झा आजाद सङ्ग अन्य आगत अतिथि संयुक्त रूपसँ दीप प्रज्ज्वलित कय केलैन्ह। एहि अवसर पर कार्यक्रम केर संबोधित करैत मंत्री सहनी कहलैन्ह जे स्व. डॉ नीलांबर बाबूक पहिचान शिक्षाक क्षेत्रमे मिथिला आर बिहारे टा मे नहिँ, देश स्तर पर छलैन्ह। ओ सभ पार्टीक सर्वमान्य नेता छलाहा। ओ एतेक सहज छलाह जे बिनु पहचानक जौं कोनो काजसँ हुनका लग पहुंचतौ तऽ ओ अवश्य कराबक लेल जोर लगा दितैथ। हुनकर स्वभाव आर काज करेबाक तरीका सेहो सहज छल। एकटा विधान पार्षद रहैत ओ सभ काज लेल सक्षम छलाह। हुनकर जोड़ाक कोनो नेता मिथिलामे नहिँ भेल। आगाँ मंत्री सहनी कहलैन्ह जे शिक्षा शेरनीक दूध जकां अछि जे पिबैत अछि ओ दहाड़ैत अछि। जे छात्र छात्रजीवनमे पुस्तक सामने झुकैत अछि दुनियां ओकरा सामने सदिखन झुकल रहैत छैक। बिहारक नीतीश सरकार द्वारा नारी हितमे कयल गेल काज, बाल विवाह प्रथा उन्मूलन, देहज उन्मूलन, नौकरीमे ३५ प्रतिशत आरक्षण, पुलिस विभागमे महिला पदाधिकारी आर कर्मिक संख्याकेँ देश स्तर पर ऐतिहासिक बतबैत मंत्री सहनी कहला जे स्टूडेंट क्रेडिट कार्ड योजना, बेरोजगारी, सड़क, नाली, गली, नल जल योजना, जल जीवन हरियाली योजना सभ ऐतिहासिक अछि। मुख्यमंत्री नीतीश कुमारकेँ युग पुरुष बतबैत हुनका दूरदर्शी नेता कहलैन्ह। एहिसँ पूर्व मंत्री सहनी सङ्ग अन्य आगत अतिथि कॉलेज परिसर स्थित डॉ नीलांबर बाबूक आदम कद प्रतिमा पर पुष्प माल्यार्पण कय हुनका श्रद्धा सुमन अर्पित कयलनि।
डॉ नीलांबर बाबूक सुपुत्र सह पूर्व विधान पार्षद डॉ दिलीप कुमार चौधरीक अध्यक्षता आ प्रो. भवानंद झा आर शिक्षक नेता अखिलेश झाक संचालनमे आयोजित कार्य्रकमक आरंभ मैथिलीक प्रसिद्ध गायिका सुभद्रा झा टीमक गोसाउनिक गीत आर भाव नृत्यसँ कयल गेल। एकर उपरांत मैथिली गायक गोपाल झा डॉ नीलांबर बाबू पर आधारित मैथिली गीत प्रस्तुत कय कार्यक्रमकेँ यादगार बना देलैन्ह। डॉ दिलीप चौधरी, मंत्री सहनी सङ्ग अन्य आगत अतिथि गणकेँ मिथिला परंपरा अनुसारेँ पाग, डोपटा आर फूलक माला पहिरा कय स्वागत कयलनि।
समारोहकेँ बेनीपट्टी नगर पंचायतक मुख्य पार्षद मंजू देवी, उप मुख्य पार्षद दीपशिखा कुमारी, भाकपा नेता कृपानंद झा आजाद, राजद अध्यक्ष रामवरण राम, जदयू अति पिछड़ा प्रकोष्ठक सचिव बचनु मंडल, जदयू प्रदेश सचिव संजीव कुमार झा मुन्ना, शिक्षा प्रकोष्ठक संजीव कुमार झा, अमरेश मिश्र, प्रखंड अध्यक्ष प्रदीप झा बासु, रूपन साह, शशिभूषण सिंह, डॉ नागेंद्र झा, प्राचार्य प्रो रामनारायण झा, ब्रम्ह कुमार झा, राघव चौधरी, मदन कुमार कर्ण, महानंद झा, कांग्रेस अध्यक्ष कौशल किशोर चौधरी, शबनम झा, टेकनाथ झा, संजय झा सङ्ग दर्जनो लोक संबोधित कयलनि। एहि अवसर पर सैकड़ो लोक उपस्थित छलाह।
