मिथिला क्षेत्रीय बिहार राज्यक पश्चिम चंपारणमे मिड डे मील खयलासँ ५० सँ बेसी बच्चा अस्वस्थ

पश्चिम चंपारण
*
पश्चिम चम्पारण जिलाक मझौलिया ब्लॉकक परसा उत्क्रमित मिडिल स्कूलमे तखनि चिल्लाहट शुरू भऽ गेल, जखनि मध्यान्ह भोजन खयलाक बाद ५०सँ बेसी बच्चा अचानक बीमार भऽ गेल। बच्चासभक हालत देखि स्कूलमे घंटो धरि अफरातफरीक माहौल बनल रहल। प्राप्त जानकारीक अनुसार स्कूलमे मध्यान्ह भोजन खयलाक बाद प्रायः ५१ टा बच्चा बीमार भऽ गेलाह। पेटमे तेज दर्द उत्पन्न होबय लागल आ मन बेचैन होबय लागल। बच्चासभक बिगड़ैत स्थिति देखैत विद्यालय प्रशासन स्कूलमे उपस्थित कुल १५२ बच्चाकेँ सन्देहक आधार पर अस्पतालमे भर्ती कयलक। अस्पतालमे उपस्थित सभटा बच्चामेसँ ५१ गोटे अस्वस्थ पाओल गेल।

प्रखंड विकास पदाधिकारी वरुण केतनक सूचना पर अस्पतालसँ एकटा एम्बुलेंस पठाओल गेल आ सभ बच्चाकेँ इलाजक लेल सामुदायिक स्वास्थ्य केन्द्र मझौलिया आनल गेल, जतय सभ छात्रक इलाज कयल गेल। विशेष रूपसँ तीनटा बच्चाकेँ बेतिया जीएमसीएच रेफर कऽ देल गेल छल। प्राप्त जानकारीक अनुसार, सभ दिन जकाँ एनजीओ द्वारा शुक्रदिन सेहो बच्चासभकेँ मध्यान्ह भोजन वितरित कयल गेल। बच्चा सभ जहिना भोजन केलक तखने बच्चाक पेटमे अचानक दर्द उठि गेल आ मोन बेचैन होमय लागल। बच्चासभक बिगड़ैत स्थिति देखि अधिकांश बच्चा प्रधानाध्यापिका पूनम कुमारीसँ शिकायत कयलनि जे पेटमे दर्द अछि। धीरे-धीरे पीड़ित बच्चाक संख्या बढ़य लागल। एकर बाद मुखिया शिवशंकर ठाकुर सेहो घटनास्थल पर पहुँचलाह आ मझौलिया थाना सहित अस्पताल प्रबंधन के जानकारी देलनि।
बच्चासभकेँ एम्बुलेंस आ पुलिसक वाहनसँ इलाजक लेल अस्पताल लऽ जायल गेल। विद्यालयक सभटा १५२ बच्चाकेँ सन्देहक आधार पर जाँचक लेल अस्पताल लऽ जायल गेल आ जाँच कयल गेल। स्कूलक किछु विद्यार्थी कहलनि जे भोजनमे भातक सङ्ग चनाक दालि देल गेल छल। जकरा खएलाक बाद हमरासभकेँ अचानक पेटमे दर्द होबय लागल। दर्द एतेक तेज छल जे सहन करब कठिन छल। सिविल सर्जन डॉ. श्रीकांत दुबे कहलनि जे ५१ गोट बच्चाक इलाज चलि रहल अछि। एहिमेसँ तीनटा बच्चाकेँ परिजनकेँ कहला पर बेतिया स्थिति जीएमसीएच रेफर कय देल गेल अछि।