होर्मुज नहिं खुजल तऽ ७ अप्रैलककेँ पावर प्लांट आ ब्रिज सब नष्ट कय देब : ट्रंप
नई दिल्ली । समदिया
अमेरिकी राष्ट्रपति डोनाल्ड ईरानकेँ चेतावनी देलनि अछि जे जँ होर्मुज स्ट्रेट नहि खोलल गेल, तऽ ओकर पावर प्लांट एवं पुल सभ पर हमला होयत। ट्रंपक 10 दिनक डेडलाइन सोमदिन खत्म होयबाला अछि, जखनिकि बातचीत बिन परिणामक रहल अछि।
अमेरिकी राष्ट्रपति डोनाल्ड ईरानकेँ फेर सख्त चेतावनी देलथि। ओ कहलनि अछि जे, जँ ईरान होर्मुज स्ट्रेट नहि खोलत, तऽ मंगलदिनसँ ओकर पावर प्लांट एवं पुल सभ पर हमला होयत। ट्रंप एहि दिनकेँ पावर प्लांट डे एवं ब्रिज डे कहलनि अछि।
ट्रंप अपन सोशल मीडिया प्लेटफॉर्म ट्रुथ सोशल पर लिखने छथि जे जँ ईरान रास्ता नहि खोलत, तऽ ओकरा नरक जेकाँ हालतक सामना करय पड़त। ओ बहुत कड़ा भाषामे कहलनि जे स्ट्रेट खोलू, नहि तऽ परिणाम भोगय लेल तैयार रहू।
होर्मुज खोलय लेल ट्रंपक 10 दिनक डेडलाइन सोमदिन खत्म होबयवाला अछि, जखनिकि बातचीत बिन परिणामक रहल अछि. ट्रंप पहिनेहोँ कहने छथि जे जँ ईरान कोनो समझौता नहि करैत अछि, तऽ ओकर बिजली, पानि एवं तेलसँ जुड़ल पैघ ढाँचा सभपर हमला कयल जाएत।
अमेरिका आ इजराइल 3 दिन पहिने ईरानक करज शहरमे B1 ब्रिज पर दू बेर हमला कयने छल, जाहिमे दू लोकक मृत्यु भऽ गेल आ 136 मीटर ऊँच पुल पूरा तरह नष्ट भऽ गेल।करीब 1050 मीटर लंबा ई पुल लगभग 400 मिलियन डॉलर (करीब ₹3,800 करोड़) केर लागतसँ बनल छल। ई ईरानक सभसँ पैघ पुल छल।
एहि बीच, ईरान एहि धमकी सभकेँ खारिज कऽ देने अछि आ कहलक अछि जे एहि तरहक हमला करब युद्ध अपराध होयत। तेहरान चेतावनी देने अछि जे जँ अमेरिका हमला करत, तऽ ओ इजराइल आ खाड़ी देश सभक महत्वपूर्ण स्थान पर प्रतिकार करत। हालक दिन सभमे अमेरिका आ इजराइल ईरानक कतेको ठाम पर हमला तेज कऽ देलक अछि। ट्रंप पहिने एकटा वीडियो सेहो शेयर कयने छलाह, जाहिमे ईरानक एकटा पैघ पुल गिरैत देखाओल गेल छल। ओ चेतौनी देने छलाह जे जँ ईरान बात नहि मानत, तऽ पुल आ पावर प्लांट अगिला निशाना होयत।
पिछला 10 दिनमे अमेरिका आ ईरानक बीच बातचीतक प्रयास सेहो भेल अछि. ई बातचीत सीधे नहि भेल, बल्कि पाकिस्तान, मिस्र आ तुर्की जेकां देश सभक माध्यम सऽ करायल गेल। एकर उद्देश्य युद्ध रोकब आ होर्मुज स्ट्रेटकेँ फेर सऽ खोलब छल, मुदा एखनि धरि कोनो खास परिणाम नहि निकलल अछि। होर्मुज स्ट्रेट दुनियाक एकटा बहुत पैघ महत्वपूर्ण रास्ता अछि। एतयसँ दुनियाक लगभग २० सँ ३० प्रतिशत तेलक सप्लाई गुजरैत अछि।
