आचार्य सुमनकें मिथिलावासी कयलनि कृतज्ञ नमन

२२ म पुण्यतिथि पर माल्यार्पण कऽ अर्पित कयलनि भाव भरल श्रद्धांजलि
*
दरभंगा समदिया
*

मिथिलाक वरद् पुत्र आचार्य सुरेंद्र झा सुमनक २२म पुण्यतिथि मंगलदिन मनाओल गेल। विद्यापति सेवा संस्थानक तत्वावधानमे आयोजित कार्यक्रममे महासचिव डाॅ बैद्यनाथ चौधरी बैजू आचार्य सुरेंद्र झा सुमनकेँ ऐतिहासिक महापुरुष बतबैत एकटा आम मैथिल, विशिष्ट साहित्यकार, कर्मनिष्ठ संपादक, जनप्रिय विधायक आ सांसदक रूपमे हुनक कृतित्व आ व्यक्तित्वक विस्तारसँ चर्चा कयलनि।

एहि अवसर पर कामेश्वर सिंह दरभंगा संस्कृत विश्वविद्यालयक पूर्व कुलपति सह संस्थानक अध्यक्ष प्रो शशिनाथ झा आचार्य सुमनक रचना-कर्मक विस्तारसँ चर्चा करैत कहलनि जे सुमन जी सही मायनेमे एकटा अमर साहित्यकार रहथि। जिनकर लेखनीमे कवि-हृदयक स्वच्छन्द भाव आ मुखसँ सिनेह आ दुलार सदैव प्रस्फुटित होइत छल। पूर्व विधान पार्षद प्रो दिलीप कुमार चौधरी अपन संबोधनमे कहलनि जे सुमन जी एकटा अमर साहित्यकार होयबाक संगहि कुशल राजनीतिज्ञ सेहो छलाह। ओ सुमनजीकेँ सजग राष्ट्रक सजग प्रहरी बतबैत कहलनि जे आचार्य सुमन अपन कृतिमे अमर छथि आ सदति अमर रहताह।

वरिष्ठ साहित्यकार मणिकांत झा कहलनि जे सुमनजी अपन सद्गुणक कारण स्वत: हृदयग्राही छलाह। मैथिली साहित्यक आकाशमे जहिना आचार्य सुमन ध्रुवतारा जकाँ चमकैत छलाह, ओहिना अमूल्य साहित्य सृजन कऽ ओ मिथिलाक सामाजिक सुधारमे सेहो अपन महत्वपूर्ण योगदान देलनि। युवा मैथिली अभियानी आशीष चौधरी अपन विचार रखैत आचार्य सुमनकेँ मैथिली साहित्यक अद्भुत उपासक आ महान राष्ट्र भक्त बतौलनि।
मीडिया संयोजक प्रवीण कुमार झा कहलनि जे सुमन जी मैथिली साहित्य जगत केर एकटा एहन साहित्यकारक रूपमे विख्यात छथि, जे विपुल साहित्यक संयोजन आ मौलिक रचनाक पश्चात स्वयंकेँ साहित्य सर्जनाक विषय बना लेने छलथि। ई निसंदेह प्रेरणास्पद अछि। मणिभूषण राजू सुरेंद्र झा सुमन रचित शिव पंचाक्षर स्तुति केर चर्चा करैत कहलनि जे देवक देव महादेवक महिमाक वर्णन करैत सुमन जी केर ई रचना भारतीय साहित्यक अनुपम, अद्वितीय आ अद्भुत कृति अछि।
एहिसँ पहिले हराही पोखरि स्थित आचार्य सुरेंद्र झा सुमनक प्रतिमा पर माल्यार्पण कऽ समस्त मिथिलावासी दिसिसँ श्रद्धा सुमन अर्पित कयल गेल। एहि अवसर पर डॉ गणेश कांत झा, दुर्गानंद झा, नवल किशोर झा, चन्दन सिंह, रामाज्ञा झा, मनीष झा रघु आदि केर उल्लेखनीय उपस्थिति रहलनि।