प्रधानमंत्री नरेन्द्र मोदी शनिदिन कहलनि जे केंद्र स्कूली शिक्षाकेँ अधिकाधिक सुलभ बनबय लेल ८५ नव केन्द्रीय विद्यालय खोलबाक स्वीकृति देलक अछि।
ओ कहलनि जे एहि डेगसँ नहिं केवल पैघ संख्यामे छात्रकेँ लाभ होयत, बल्कि रोजगारक बहुत रास नव अवसर सेहो पैदा होयत। मोदी एक्स पर लिखलनि, “हमर सरकार स्कूली शिक्षाकेँ बेसी सुलभ बनेबाक लेल एकटा आओर पैघ निर्णय लेलक अछि। एकर अन्तर्गत देशभरिमे ८५ नव केन्द्रीय विद्यालय खोलल जायत। एहि डेगसँ नहिं केवल पैघ संख्यामे छात्रकेँ लाभ होयत, बल्कि रोजगारक बहुत रास नव अवसर सेहो उत्पन्न होयत।”
प्रधानमंत्री कहलनि जे सरकार राष्ट्रीय शिक्षा नीतिक अनुरूप समाजक प्रत्येक वर्गकेँ स्कूली शिक्षा प्रदान करबाक लेल प्रतिबद्ध अछि। पीएम एकटा आर पोस्टमे कहलनि, “हम राष्ट्रीय शिक्षा नीतिक अनुरूप स्कूली शिक्षाकेँ समाजक प्रत्येक वर्ग धरि पहुँचेबाक लेल प्रतिबद्ध छी। एहि श्रृंखलामे हमर सरकार देशभरिमे २८ नव नवोदय विद्यालयक मंजूरी देलक अछि। एहिसँ आवासीय आ गुणवत्तापूर्ण स्कूली शिक्षाक बहुत हद धरि विस्तार होयत।”
प्रधानमंत्री इहो कहलनि जे हुनक सरकार देश भरिमे सम्पर्कतामे सुधार लेल प्रतिबद्ध अछि। मोदी कहलनि, “एहि दिशामे हमर सरकार राष्ट्रीय राजधानी क्षेत्रमे दिल्ली मेट्रोक चारिम चरणक अन्तर्गत रिठाला-कुंडली काॅरीडोरकेँ मंजूरी देलक अछि। एहिसँ दिल्ली आ हरियाणाक बीच आवागमन आसान भऽ जायत।
