केन्द्रीय कपड़ा मंत्री गिरिराज सिंह हिन्दूसभकेँ एकजुट करबाक लेल स्वाभिमान यात्रा निकालि रहल छथि। भागलपुरसँ प्रारम्भ भेल ई यात्रा पूर्णिया पहुँचि गेल अछि।
एम्हर गिरिराज सिंह भागलपुरक सन्हौला बाजारक राम-जानकी मन्दिरमे मूर्ति तोड़फोड़क घटना पर प्रहार कयलनि अछि। ओ बिहार पुलिसकेँ चेतौनी देलनि जे जँ जरूरत पड़लतँ ओ अपन यात्रा स्थगित कऽ सन्हौला जयताह।
दरअसल, लोक एहि घटनाक विरोधमे सड़क पर उतरि गेल अछि। मुदा, पुलिस तत्काल कारवाई करैत आरोपीकेँ गिरफ्तार कऽ लेलक अछि।
जानकारीक अनुसार सन्हौला बाजारक राम जानकी मन्दिरमे किछु असामाजिक तत्व मूर्तिकेँ क्षतिग्रस्त कऽ देलक, जकर बाद स्थानीय निवासीमे आक्रोश पसरि गेल। लोक पैघ संख्यामे जमा भेलाह आ पुलिस प्रशासनक विरुद्ध नाराबाजी कयलनि। हंगामा एतेक बढ़ि गेल जे क्षेत्रक सड़कसभ अवरुद्ध भऽ गेल, जाहिसँ यातायात प्रभावित भेल।
प्रतिक्रिया पूछला पर सिंह कहलखिन, “ई आइ (रवि) भोरमे भेल। १८ अक्टूबरकेँ हम भागलपुरमे छलहुँ। ई हमला एकटा सुनियोजित षड्यंत्रक तहत कयल गेल अछि। जँ आरोपी पागल अछि तखन ओ मस्जिद पर हमला करबाक लेल किएक नहि गेल। वीडियो फुटेजमे तीनटा आदमी देखल जा रहल अछि। एकर पाछू कांग्रेस आ राजद अछि। ओ दंगा भड़काबए चाहैत अछि। हम प्रशासनकेँ कहय चाहैत छी जे जँ असली आरोपी नहि पकड़ल गेल तँ हम अपन यात्रा स्थगित कऽ सन्हौला चलि जाएब।
भागलपुरक वरिष्ठ पुलिस अधिकारी शान्ति समितिक सदस्य आ गणमान्य लोकनिक सङ्ग बैसार कयलनि आ एहि घटनापर फ्लैग मार्च निकाललनि। भागलपुर पुलिस लोकसभसँ भ्रामक समाचार आ अफवाह नहि पसारबाक अपील कयलक अछि आ कहलक अछि जे हुनका लोकनिक विरुद्ध कठोर कानूनी कारवाई कयल जायत।
