अंचलाधिकारी सहित तीन गोटे पर सामूहिक दुष्कर्मक मामिला दर्ज
मुजफ्फरपुर
*
बिहारक मिथिला क्षेत्रीय मुजफ्फरपुरमे अदालती आदेशक बाद नौकरी देबय केर बहानासँ एकटा महिलाकेँ कथित रूपसँ यौन शोषणक आरोपमे एकटा सीओ आ दू टा कर्मचारीक खिलाफ एफआईआर दर्ज कैल गेल अछि।
पुलिस आब सीओ आ कर्मचारीक खिलाफ सामूहिक दुष्कर्म आ यौन शोषणक आरोपक जाँच करत।
कहल जा रहल अछि जे मिठनपुरा थाना क्षेत्रक एकटा २२ वर्षीय महिला सीओ पर आरोप लगओलनि अछि जे ८ अगस्त, २०२३ केँ ओ नोकरीक लालच दऽ कऽ अपन कार्यालयमे फोन कयलनि। जखन ओ ऑफिस गेलीह तखन हुनकर यौन शोषण कयलक।
ओकर बाद ११ अगस्त, २०२३ केँ सीओ हुनका अपन निवास पर बजौलनि आ तखन आरोपीसभ हुनका सङ्ग सामूहिक दुष्कर्म कयलक।
पीड़िता एहि साल ४ अक्टूबरकेँ एसीजेएम-१ पश्चिमक अदालतमे शिकायत दर्ज कयने छलीह।
पीड़िताक तरफसँ अधिवक्ता सुधीर कुमार ओझा एहि मामिलाक पैरवी कयलनि। एकर बाद कोर्ट कांटी पुलिसकेँ एफआईआर दर्ज करबाक आ मामिलाक जाँच करबाक आदेश देलक अछि।
अदालतक आदेशक बाद बुधदिन कांटी पुलिस स्टेशनमे प्राथमिकी दर्ज कयल गेल आ पुलिस जाँच शुरू कऽ देलक।
एहि मामलामे मुजफ्फरपुरक कांटी जोनक सीओ राजशेखर, कर्मचारी मुमताज आ जितेंद्र कुमारकेँ आरोपी बनाओल गेल अछि। पीड़िता कहलक जे ओ पहिने एफआईआर दर्ज करबाबय लेल पुलिस स्टेशन गेल छलीह, मुदा एफआईआर दर्ज नहिं कयल गेल, तखन ओ अदालतक दरवाजा खटखटेलीह।
