प्रधानमंत्री नरेन्द्र मोदी मंगल कऽ जम्मूक लेल ३२,००० करोड़ टाकासँ बेसीक विकास परियोजनाक घोषणा कयलनि। एहिमेसँ कतेको परियोजनाक उद्घाटन कयल गेल आ कतेको परियोजनाक आधारशिला पीएम मोदी रखलनि। प्रधानमंत्री मोदी द्वारा जम्मूकेँ देल गेल उपहारमे स्वास्थ्य, शिक्षा, रेलवे, सड़क, विमानन, पेट्रोलियमक सङ्ग-सङ्ग नागरिक बुनियादी ढाँचा सहित कतेको क्षेत्रसँ सम्बन्धित अछि।
एहि अवसर पर पीएम मोदी एतय एकटा जनसभाकेँ सेहो सम्बोधित कयलनि आ कहलनि जे एहि स्थानसँ हमर ४० सालसँ बेसी समयसँ सम्बन्ध अछि। ओ ओतयक लोकसभसँ वादा कयलनि जे जम्मू-कश्मीरकेँ विकसित कइए कऽ रहब। ओ कहलनि जे एकटा एहनो दिन छल जखन जम्मू-कश्मीरसँ मात्र निराशाक समाचार अबैत छल। बम, बंदूक, अपहरण, अलगाव… एहन बातकेँ जम्मू-कश्मीरक दुर्भाग्य बना देल गेल छल। मुदा आइ जम्मू-कश्मीर विकसित होबय केर संकल्पक संग आगू बढ़ि रहल अछि।
परिवारवादकेँ लऽ कऽ विपक्ष पर निशाना साधैत पीएम मोदी कहलनि, “जम्मू-कश्मीर कतेको दशकसँ पारिवारिक राजनीतिक शिकार रहल अछि। जे पारिवारिक राजनीति करैत छथि ओ सदैव अपन स्वार्थ मात्र देखलनि अछि, अहाँक हितक चिन्ता नहिं करैत छथि आ परिवारवादक राजनीतिसँ जँ कियो सबसँ बेसी नोकसान उठाबैत अछि तऽ हमर युवा सभ उठबैत छथि। जे सरकार मात्र एकटा परिवारकेँ आगू बढ़यबामे लागल अछि, ओ सरकार अपन राज्यक आन युवाक भविष्य दांव पर लगेबे करत। एहन परिवारवादी सरकार युवाक लेल योजना बनेबाकेँ प्राथमिकता तक नहिं दैत अछि। जे लोक मात्र अपन परिवारक बारेमे सोचैत छथि ओ अहाँक परिवारक चिन्ता कहियो नहिं करत। हमरा खुशी अछि जे जम्मू-कश्मीर एहि पारिवारिक राजनीतिसँ छुटकारा पाबि रहल अछि।”
प्रधानमंत्री मोदी आगू अनुच्छेद ३७० केर उल्लेख करैत कहलनि, “३७० केर शक्ति देखू, ३७० केर जाय केर कारण, आइ हम साहसपूर्वक देशवासीसँ कहलहुं जे अगिला चुनावमे भाजपाक ३७० आ एनडीए केर ४०० केर पार कय दियौ। आब राज्यक कोनो क्षेत्र पाछू नहिं रहत, सब कियो मिलि कऽ आगू बढ़त, एतय जे लोक दशकसँ अभावमे जीबि रहल छलथि, हुनको सभकेँ आइ सरकारकेँ होबय केर एहसास भऽ रहल छनि।”
ओ कहलनि कि आइ जम्मू-कश्मीर विकसित होबय केर संकल्पक संग आगू बढ़ि रहल अछि। आब हम विकसित जम्मू-कश्मीरक संकल्प लेलौंह अछि। हमरा अहाँसभ पर विश्वास अछि कि हम विकसित जम्मू-कश्मीर बनाकऽ रहब। ७०-७० सालसँ अधूरा अहाँक सपना आबयवाला किछुए वर्षमे मोदी पूरा कय देत।
