महाराष्ट्रमे कांग्रेसकेँ पैघ झटका लागल अछि। महाराष्ट्रक पूर्व मुख्यमंत्री अशोक शंकरराव चव्हाण पार्टीसँ इस्तीफा दऽ देलनि अछि। इस्तीफा देलाक बाद अशोक चव्हाण कहलनि, “हम आइ कांग्रेस पार्टीक विधायकक रूपमे अपन इस्तीफा अध्यक्षकेँ सौंपि देने छी। हम एखन धरि कोनो पार्टीमे शामिल हेबाक निर्णय नहिं लेलहुं अछि। हमरा सामने एखनहु दू दिन शेष अछि। दू दिनक बाद हम अपन राजनीतिक भूमिका स्पष्ट करब।” काल्हि धरि हम कांग्रेसक राज्य बैसारमे उपस्थित छलहुँ। हम कोनो कांग्रेसी विधायकसँ बात नहिं कयलहुं।
ओ प्रदेश कांग्रेस अध्यक्ष नाना पटोलेकेँ अपन इस्तीफा सौंपि देने छथि। संगहि आब एहन कयास लगाओल जा रहल अछि जे आब ओ भाजपामे शामिल भऽ सकैत छथि। कहल जा रहल अछि जे भाजपामे शामिल भेलाक बाद हुनका राज्यसभाक टिकट देल जा सकैत अछि।
चव्हाण महाराष्ट्रमे तीव्र राजनीतिक गतिविधिक बीच विधानसभा अध्यक्ष राहुल नार्वेकरसँ भेंट कयलनि। ओकर बाद ओ गायब भए गेलाह।
ओ अपन त्यागपत्रमे अपनाकेँ ‘पूर्व विधायक’क रूपमे उल्लेख कयने छथि, मुदा ई ध्यान देबाक चाही जे ओ अपन त्यागपत्रक पाछाँ कोनो तरहक कारणक खुलासा नहिं कयलनि अछि।
राजनीतिक घटनाक्रमक बाद पटोले दिल्ली चलि गेल छथि, जतय अशोक चव्हाण द्वारा लेल गेल आश्चर्यजनक निर्णय पर पार्टीक वरिष्ठ नेताक सङ्ग विचार-विमर्श करबाक सम्भावना अछि।
