झारखंडक पूर्व मुख्यमंत्री हेमंत सोरेन रांची जेलसँ रिहा, भेटल जमानत

राँची
*

झारखंड उच्च न्यायालय पूर्व मुख्यमंत्री हेमंत सोरेनकेँ जमानत दऽ देलक अछि। अदालत शुक्रदिन सोरेनकेँ कथित भूमि घोटालासँ जुड़ल धनशोधनक मामिलामे जमानत दऽ देलक। जमानत भेटलाक बाद हेमंत शुक्रक साँझ रांचीक बिरसा मुंडा जेलसँ बाहर आबि गेलाह। अदालत १३ जूनकेँ सोरेनक जमानत याचिका पर अपन आदेश सुरक्षित राखि लेने छल।

हेमंत सोरेनक जमानत भेटलाक बाद पार्टी नेता आ समर्थकमे उत्साह देखल गेल।
एहिसँ पहिने सोरेनक वरिष्ठ वकील अरुणाभ चौधरी कहलनि जे सोरेनकेँ जमानत देल गेल अछि। जमानत देबाक अपन आदेशमे अदालत कहलक जे प्रथम दृष्टया ओ दोषी नहिं छथि आ जमानत पर रिहा होयबाक क्रममे याचिकाकर्ताक कोनो अपराध करबाक कोनो संभावना नहिं अछि।

झारखंड मुक्ति मोर्चा (झामुमो)क कार्यकारी अध्यक्ष सोरेनकेँ प्रवर्तन निदेशालय ३१ जनवरीकेँ धनशोधनक जाञ्चक संबंधमे गिरफ्तार कयने छल। ४८ वर्षीय सोरेन एखनि बिरसा मुंडा जेलमे छलथि। सुनवाईक दौरान ईडी केर वकील एस वी राजू दलील देलनि कि जँ सोरेनकेँ जमानत पर रिहा कऽ देल जायत त ओ फेरसँ एहने अपराध करत।

सोरेनक विरुद्ध जाँच राँचीमे ८.८६ एकड़ जमीनसँ सम्बन्धित अछि। ईडीक आरोप अछि जे एहि पर अवैध कब्जा कयल गेल छल। एजेंसी सोरेन, प्रसाद आ सोरेनक कथित “फ्रंटमैन” राज कुमार पाहन आ हिलारियास कच्छप एवं पूर्व मुख्यमंत्रीक कथित सहयोगी बिनोद सिंहक खिलाफ ३० मार्चकेँ एतय एकटा विशेष पीएमएलए अदालतमे आरोपपत्र दाखिल कयने छल। सोरेन राँचीक एकटा विशेष अदालतमे जमानत याचिका दायर कयने छलाह जाहिमे आरोप लगाओल गेल छल जे हुनकर गिरफ्तारी राजनीतिक रूपसँ प्रेरित छल आ हुनका भाजपामे शामिल होयबाक लेल बाध्य करबाक योजनाबद्ध षड्यंत्रक हिस्सा छल।