प्रसिद्ध पार्श्व गायक उदित नारायणक “चौमुख दियरि” छठि गीत भेल रिलीज

प्रसिद्ध पार्श्व गायक उदित नारायणक “चौमुख दियरि” छठि गीत भेल रिलीज
*
!! वृहस्पतिदिन (दिनांक 23.10.2025) सायंकाल अँधेरी स्थित रेड बल्ब स्टूडियोमे मैथिल बुद्धिजीवीक जुटान देखल गेल। अवसर छल, एमजेआरके प्रतिष्ठानक तत्वावधानमे एक टा छठि गीतक प्रदर्शन केर, जाहिमे पार्श्वगायक उदित नारायण झा आभिनय सेहो कएने छथि।

हालहिमे शूट भेल एहि शॉर्ट फिल्मक निर्माता एमजेआरके नामक प्रतिष्ठान अछि, जे प्रसिद्ध समाजसेविका, महिला उद्यमी मनोरमा झा द्वारा संचालित अछि। “चौमुख दियरि” एहि छठि गीतक गीतकार छथि दीपिका झा, एवं संगीत – काशी कश्यपक छन्हि त’ संतोष झा केर निर्देशनमे एहि छठि गीतक निर्माण पूर्ण कएल गेल अछि।

टीसीरिज द्वारा रिलीज भेल ई छठि गीत, अत्यंत कर्णप्रिय अछि, त’ निश्चित रूपसँ मैथिली गीत संगीतक क्षेत्रमे अप्पन स्थान बनाओत किएक त’ एहि गीतक स्वर, उदित नारायण झा देने छथि ।

कार्यक्रममे उदित नारायण झा, एहि गीतक निर्माण, शूटिंग एवं प्रदर्शन संगहि प्रसारण, हर विषय पर अप्पन अनुभव साझा करैत कहलनि कि, मैथिल होयबाक नाते छठि पाबनिसँ अत्यधिक लगाव अछि, श्रद्धाक एहि पर्वमे अनेको सन्देश छुपल अछि, स्वास्थ्य, आरोग्यक संग-संग ई महापर्व, पर्यावरणक प्रति लोककेँ जागरूक सेहो करैत अछि। उदित नारायण आगू कहलनि कि, “पूर्वमे सेहो एक बेर, लगभग बीस वर्ष पहिने एकटा छठि गीत गौने छलौंह मुदा, आई धरि पर्दा पर अभिनयसँ स्वयंकेँ दूर रखलौंह”। मुदा “चौमुख दियरि” एहि गीतमे स्वयंकेँ अभिनय करयसँ रोकि नहि सकलौंह।

पत्रकार वार्ताक क्रममे, उदित नारायण, हर विषय पर अप्पन बेवाक विचार रखलनि, ओ, मैथिल नवोदित गायक एवं गायिका सभक लेल कहलनि कि, “गीत संगीत, साधना अछि, मात्र कठिन परिश्रम, निरंतर प्रयास संगहि ईश्वरीय कृपा, अहाँकेँ सफल बनाओत, एहि सभ प्रक्रियामें कोनो प्रकारक शॉर्टकट मार्ग नहि छैक”।

कार्यक्रमक संचालन मनोरमा झा द्वारा संपन्न भेल, जे एहि शार्ट फिल्मक निर्मात्री सेहो छथि, संगहि अप्पन दमदार अभिनयसँ स्वयंकेँ सिद्ध सेहो कएलनि अछि। अप्पन सम्बोधनमे मनोरमा कहलनि कि, मिथिला आ मैथिली लेल जतेक कार्य संभव होय करैत रहबाक चाही। हुनका हिसाबेँ मिथिलामे एखनहु बहुत रास कार्य होयब बाकी अछि, जे बिनु सभक सहयोगे असंभव अछि। गीत संगीतक क्षेत्रमे, काव्य – साहित्यक क्षेत्रमे अथवा नारी सशक्तीकरणक गप्प होय, मनोरमा झा सदैव तत्पर रहैत छथि।

एहि कार्यक्रममे स्थानीय मैथिल बुद्धिजीवी वर्गक जुटान सेहो देखल गेल, उपस्थित गणमान्य लोकमे, अभिनेता अजित झा, नित्या पाठक (सुलभ इंटरनेशनल), वि एन झा, प्रवीण झा, धर्मेंद्र कुमार झा, आनंद मोहन झा, नीलेश झा, प्रतिभा झा, अनीता झा, रामसुंदर झा, विनोद कुमार झा (सरकार), राजीव सिंह (अभिनेता) ललितेश मिश्र (अभनेता), रंजू राजेश झा, दीपिका झा (लेखिका) संतोष झा (निर्देशक) काशी कश्यप, संगहि अनेको विशिष्ट, अति विशिष्ट लोकक सहभागिता प्रमुख रूपसँ देखल गेल।

उपस्थित दर्शकगण द्वारा, एहि सफल कार्यक्रम लेल युवा समाजसेवी रोहन झा द्वारा कएल गेल परिश्रमक मुक्त कंठसँ प्रसंशा कएल गेल। किएक त’ रोहन झा, सदैव पर्दाक पाछा रहि अप्पन कर्तव्यक निर्वहन करबा लेल प्रसिद्ध छथि।