पटना व्यवहार न्यायालय परिसरमे गेट नंबर एक लग ट्रांसफार्मर विस्फोट भेल अछि। एहि दुर्घटनामे दोकानदार आ ओकील सहित चारि गोटे झुलसि गेलाह। एहिमे वकील देवेन्द्र प्रसादक मृत्यु भऽ गेलनि। घटनाक बाद अशोक राजपथमे हड़कंप मचि गेल। तुरन्त पीरबहोर थाना पुलिस आ अदालत परिसरमे उपस्थित वकीलसभ सभकेँ पीएमसीएच लऽ गेलाह, ओहिमे सँ एकटाक मृत्यु भऽ गेल। एतय सूचना भेटैत अग्निशमन दलक टीम घटनास्थल पर पहुँचल आ कठिन परिश्रमक बाद ट्रांसफार्मरमे लागल आगि पर काबू पओलक। एतय एहि घटनाक बाद अधिवक्ता लोकनि दीवानी अदालतक गेट पर हंगामा शुरू कऽ देलनि अछि। अधिवक्ताक कहब छनि जे एतय सुरक्षाक नाम पर किछु नहिं अछि।
लोकक कहब छनि जे शॉर्ट सर्किटक कारण गेट नंबर १ लग एकटा ट्रांसफार्मरमे भयंकर विस्फोट भऽ गेल। भीषण विस्फोटमे ट्रांसफार्मरक उबलैत तेल बहुत दूर तक खसल। ओतय उपस्थित वकील आ दोकानदार सहित चारि गोटे उबलैत तेलक चपेटमे आबि गेलाह। जाधरि लोक वकील देवेन्द्र प्रसाद लग पहुँचल, हुनकर मृत्यु भऽ गेलनि। घायल सभकेँ तुरन्त अस्पतालमे भर्ती कराओल गेल । दुर्घटनाक बाद अशोक राजपथमे जाम लागि गेल। बहुत काल धरि अफरातफरीक स्थिति मचल रहल।
एतय आक्रोशित वकील अदालत परिसरमे धरना पर बैसि गेल छलथि। ओ सभ हंगामा कए रहल छलथि। ओ कहैत छथि जे सुरक्षा ऑडिट कतेको सालसँ नहिं भेल अछि। ट्रांसफार्मर बहुत पुरान छल, राजधानीक जिला अदालतमे बुनियादी सुविधाक अभाव है। एहि कारणेँ वकीलसभकेँ जतय-ततय बैसए पड़ैत अछि। वकील पुलिससँ कार्रवाई केर मांग कए रहल छथि।
