सीएम साइंस कॉलेज केर कर्मचारी कारी पट्टी लगा मंगलदिन कयलनि काज, संगठन विरोधी ताकत केर प्रति जतौलनि विरोध

दरभंगा समदिया
*
बिहार राज्य विश्वविद्यालय एवं महाविद्यालय शिक्षक व शिक्षकेत्तर कर्मचारी समन्वय समिति केर आह्वान पर सीएम साइंस कॉलेजक कर्मचारी मंगलदिन कारी पट्टी लगा अपन काजक निष्पादन कयलनि। महाविद्यालयक शिक्षकेत्तर कर्मचारी संघक अध्यक्ष राधेश्याम झा बतेलनि जे पूर्व निर्धारित कार्यक्रमक तहत कारी पट्टी लगा महाविद्यालयक सभ कर्मचारी अपन दायित्वक निर्वहन करैत संगठन विरोधी फरमान केर मंगलदिन बहिष्कार कयलनि। जखनकि 12 जनवरी कें महाविद्यालयक सभ कर्मचारी सामूहिक अवकाश पर रहैत संगठन विरोधी फिरका परस्त ताकतक संगठित भऽ मुँहतोड़ जवाब देबा लेल ललित नारायण मिथिला विश्वविद्यालय मुख्यालय पर आयोजित धरना प्रदर्शनमे भाग लेताह।
महाविद्यालय केर शिक्षकेत्तर कर्मचारी संघ इकाई केर सचिव अनुपम कुमार झा कहलनि जे वर्तमान समयमे बिहारक शिक्षा जगत अघोषित आपातकाल सन स्थिति केर सामना कऽ रहल अछि। शिक्षक आ कर्मचारी लोकनिक मौलिक आ लोकतांत्रिक अधिकारक संग-संग, संघ-संगठन केर गठन ओ एकर क्रियान्वयनसँ संबंधित हमर संवैधानिक अधिकार पर राज्य सरकारक संरक्षणमे शिक्षा विभागक किछु बेलगाम अधिकारी लगातार हमला कऽ एकरा छीनबाक नापाक कोशिश कऽ रहल छथि। एकर डटिकऽ विरोध कयल जायब समय केर मांग अछि।
कर्मचारी लोकनि एकटा प्रस्ताव पारित कऽ संघ-संगठन केर हिफाजत लेल मीडिया आकि सोशल मीडियामे आवाज उठेनिहार शिक्षक आ कर्मचारी नेता सभ पर राज्य सरकारक संरक्षणमे दण्डात्मक कार्रवाई लेल लगातार निकालल जा रहल आदेशक भर्त्सना कयलनि। सभ कर्मचारी एक स्वरमे शासन आ प्रशासन द्वारा निकालल जा रहल कर्मचारी विरोधी दमनकारी फरमान केर प्रतिरोध करबा आ एकर समाधान होयबा धरि संघर्ष जारी रखने रहबाक संकल्प लेलनि। कारी विल्ला लगा विरोध जताबय बला कर्मचारीमे शिवशंकर झा, उमेश कुमार ठाकुर, रोहित कुमार झा, प्रवीण कुमार झा, आकाश कुमार वर्मा, चेतकर झा, आदित्य नाथ झा, प्रफुल्ल कुमार झा, रवीन्द्र कुमार यादव, जितेंद्र राम, जितेंद्र महतो, लीला कुमारी, रमाशंकर भंडारी, जरीना खातून, चंद्रकांत चौधरी, दिलीप मंडल, सतीश कुमार, रमेश कुमार कामती, जयकांत कामती, राजेश कुमार सिंह, अनुपम शेखर सिंह, संतोष कुमार, मिसरी साह, रतन मिश्रा, रामशंकर भंडारी, कुमार राजर्षि, सुरेश बहादुर , रामनारायण साह आदि प्रमुख छलाह।