किछु राज्यक विधानसभा चुनावक सेहो होयत घोषणा
*
नई दिल्ली
*
देशमे लोकसभा चुनावक तारीखक घोषणा आइ कयल जायत। एकर संगहि किछु राज्यमे विधानसभा चुनावक घोषणा सेहो कयल जायत। चुनाव आयोग कहलक जे लोकसभा चुनाव आ किछु राज्यक विधानसभा चुनावक कार्यक्रमक घोषणा शनि कऽ कयल जायत। चुनाव आयोग दुपहरिया ३ बजे प्रेस कॉन्फ्रेंस कऽ एकर घोषणा करत। वर्तमान लोकसभाक कार्यकाल १६ जूनकेँ समाप्त भऽ रहल अछि आ ओहिसँ पहिने नव सरकारक गठनक प्रक्रिया पूरा करय पड़त।
लोकसभा चुनावक सङ्ग आन्ध्र प्रदेश, ओडिशा, सिक्किम आ अरुणाचल प्रदेशमे विधानसभा चुनावक तारीखक घोषणा सेहो कयल जा सकैत अछि। एहिसँ जम्मू-कश्मीरमे चुनाव होयत कि नहिं, ओ सेहो आइ स्पष्ट भए जाएत। चुनावक तारीखक घोषणा चुनाव आयोगक सोशल मीडिया प्लेटफॉर्म पर सीधा प्रसारित कयल जायत।
लोकसभा चुनावक तारीखक घोषणा अन्तिम बेर १० मार्च २०१९ केँ कयल गेल छल। तखन देशमे सात चरणक चुनाव भेल। पहिल चरणक मतदान ११ अप्रैलकेँ भेल छल, जखन कि सातम चरणक मतदान १९ मईकेँ भेल छल। वोटक गिनती 23 मईकेँ भेल छल।
२३ मई, २०१९ केँ आयल चुनाव परिणाममे भाजपाकेँ ३०३ सीट भेटल। भाजपा ५४३ सदस्यीय लोकसभामे २७२ केर बहुमतक अंकसँ बहुत आगू छल। एहि जीतक सङ्ग पार्टी लगातार दोसर बेर सरकार बनौलक। मुख्य विपक्षी दल कांग्रेसकेँ ५२ सीटसँ संतुष्ट रहय पड़ल। ओतहि द्रविड़ मुनेत्र कड़गम (डीएमके) केँ २४ सीट भेटल। वाईएसआरसीपी आ टीएमसी २२-२२ सीट जीतबामे सफल रहल।
