उत्तर प्रदेश, कर्नाटक आ हिमाचल प्रदेशक १५ सीटक लेल मंगलदिन राज्यसभाक चुनाव भेल। समाचार लिखय केर समय तक वोटक गिनती चलि रहल छल। यूपीमे राज्यसभाक १० सीटक लेल चुनाव भेल अछि। कुल ३९५ मतदाता १० सीटक लेल वोट देबाक पात्र छथि। राज्यसभा चुनावक परिणाम देर साँझ धरि घोषित भऽ जायत। सूत्रक अनुसार, राज्यसभा चुनावमे भाजपाक सभ उम्मीदवार सुधांशु त्रिवेदी, आरपीएन सिंह, चौधरी तेजवीर सिंह, साधना सिंह, अमरपाल मौर्य, संगीता बलवंत, आ आगराक मेयर नवीन जैनक जीत तय मानल जा रहल अछि। ओतहि समाजवादी पार्टीसँ जया बच्चन आ पीडीएक उम्मीदवार रामजीलाल सुमनक सेहो राज्यसभा चुनावमे जीत तय मानल जा रहल अछि।
ओतहि सपाक तेसर उम्मीदवार पूर्व आईएएस आलोक रंजनक सीट अटकल बुझाइत अछि। उत्तर प्रदेशमे राज्यसभाक १० सीटक लेल चुनाव भेल छल। ३९९ मतदातामे सँ कुल ३९५ मतदाता अपन वोट देलनि। पूर्व मंत्री गायत्री प्रजापतिक पत्नी महाराजी देवी मतदान नहिं कयने छलीह। महाराजी देवी वोट देबय लेल नहि अयलीह। जानकारीक अनुसार एहि दौरान समाजवादी पार्टीक विधायक कसिकय क्रॉस वोटिंग कयलनि। सपाक सात टा विधायक प्रायः भाजपाक पक्षमे मतदान कयलनि अछि।
एहिसँ पहिने जहिना उत्तर प्रदेशमे राज्यसभाक १० सीटक लेल मतदान शुरू भेल, समाजवादी पार्टीमे भगदड़ मचि गेल। पार्टीक मुख्य सचेतक आ उंचाहारक विधायक मनोज पाण्डेय अपन पदसँ इस्तीफा दऽ देलनि। एकर अतिरिक्त सपाक चारि गोट आर विधायक सेहो जय श्री रामक नाराक संग क्रॉस वोटिंग कयलनि। सपा प्रमुख अखिलेश यादवक लेल ई स्थिति सामान्य नहिं छल। ओ स्वयं स्वीकार कयलनि जे पार्टीक किछु विधायक क्रॉस वोटिंग कयलनि आ आब हुनकालोकनिक विरुद्ध पैघ कार्रवाई होयत।
उत्तर प्रदेशक राज्यसभाक १० सीटमेसँ आठ उम्मीदवार भाजपा आ तीनटा समाजवादी पार्टीक छल। इहो संकेत अछि जे सपाक तेसर उम्मीदवार नहिं जीत रहल छथि। सपाक आठ विधायक क्राॅस वोटिंग कयलनि, जाहिमे राकेश पाण्डेय, राकेश प्रताप सिंह, अभय सिंह, विनोद चतुर्वेदी, मनोज पाण्डेय, महाराजी देवी (गैर हाजिर), पूजा पाल (एनडीए केर देलनि वोट) आ आशुतोष मौर्य (गैर हाजिर) छलथि।
