दरभंगामे आरओबी निर्माणक दौरान घरक दीवार खसल, ८ गोटे दबायल, १ बच्चीक मृत्यु

दरभंगा समदिया
*

दरभंगा जिलामे रेलवे ओवरब्रिजक निर्माणक क्रममे एकटा पैघ दुर्घटना भेल अछि। विश्वविद्यालय थाना क्षेत्रक कंगवा गुमटी नम्बर २८ लग रेलवे ओवर ब्रिजक निर्माणक अन्तर्गत पुलक पिलरक निर्माणक लेल पोकलेनसँ माटिक खुदाई कयल जा रहल छल। एम्हर पोकालेनक अनायास टकरावसँ घरक देवाल खसि पड़ल। घटनाक समय घरमे आठ गोटे छलाह। सभ लोककेँ तुरन्त घरसँ बाहर निकालि इलाजक लेल अस्पताल पठाओल गेल। मुदा इलाजक दौरान एकटा बच्चाक मृत्यु भऽ गेल। एहि घटनाक बाद घरमे मातम पसरल अछि।

जानकारीक अनुसार मंगलक राति रेलवे ओवरब्रिजक निर्माणक लेल खुदाई कयल जा रहल छल। एम्हर पोकलेनक पछिला भाग सड़कसँ सटल एकटा घरसँ टकरा गेल। एहि टकरावक कारण घरक दीवार ढ़हि गेल। जाहि कारणेँ एके परिवारक आठ गोटे देवालक नीचा दबि गेल। स्थानीय लोकक मदतिसँ सभकेँ बाहर निकालि अस्पताल लऽ जायल गेल। इलाजक दौरान एकटा बच्चीक मृत्यु भए गेल। मृतक बालिकाक पहिचान सीताराम महतोक बेटी दीपांशु भेल अछि। ओकर आयु एक वर्ष कहल जाइत अछि। एहि दुर्घटनामे दूटा आओर लोक सेहो घायल भऽ गेलाह।

एहि मामिलामे विश्वविद्यालय पुलिस थानाक प्रमुख सुधीर कुमार कहलनि जे बुधदिन भोरे हमरा सूचना भेटल जे मंगलदिन देर राति कंगवा गुमटी लग एकटा घरक दीवार ढ़हि गेल अछि। एहिमे इलाजक क्रममे एकटा बच्चीक मृत्यु भऽ गेल। ओ इहो कहलनि जे एहि घटनामे दूटा आओर लोक घायल भेल छल। जिनका मामूली चोट लागल अछि। एसएचओ कहलनि जे कंगवा गुमटीमे निर्माण कार्य चलि रहल अछि। एहि क्रममे पोकलेनसँ माटि खोदबाक काज चलि रहल छल। एहि क्रममे ई दुर्घटना भेल।