बिहार राज्य आंगनबाड़ी संयुक्त संघर्ष समितिक आह्वान पर मानदेय वृद्धि सङ्ग अन्य 5 – सूत्री मांग के ल’ बीतल 29 सितंबरसँ जारी हड़तालक समर्थनमे आंदोलनमे शामिल जिलाक चयनमुक्त 36 आंगनबाड़ी सेविका सभ अपन अपन प्रखंड मुख्यालय स्थित समेकित बाल विकास परियोजना कार्यालयमे सोम दिन योगदान देलीह। एकर सङ्ग सभ सेविका अपन-अपन कार्यभार सेहो सम्हारि लेलीह। योगदान करय वाली सेविकामे मधवापुर प्रखंडक केंद्र संख्या 31 केँ कविता कुमारी, केंद्र संख्या 74 केँ हीरा कुमारी, केंद्र संख्या 11 केँ उषा रानी, केंद्र संख्या 42 केँ रोमा कुमारी, केंद्र संख्या 145 केँ ललिता भारती सङ्ग जिलाक 36 सेविका शामिल छैथ। ओतै योगदान कयलाक उपरांत सभ सेविका महिला पर्यवेक्षिका आर कार्यालय कर्मी सभकेँ मिठाई खुआ क’ खुशी जतौलीह। एहि क्रममे महिला पर्यवेक्षिका अनिता कुमारी, सपना कुमारी, प्रीति कुमारी विभा कुमारी सेहो योगदान करय वाली सभ चयनमुक्त सेविका सबहक कार्य पर वापसी आ मानदेयमे सम्मानजनक वृद्धि भेलाक घोषणा पर खुशी जतबैत मिठाई खुआ बधाई आ शुभकामना देलीह। सँगहिं आगाँ आओर नीक सेवा देबाक लेल प्रेरित केलीह। एहि अवसर पर सभ पर्यवेक्षिका कहली जे अहाँ सबहक आंदोलन सफल रहल। उम्मीद अछि जे आगाँ सेहो अहाँ सभ निष्ठापूर्वक अपन कर्तव्य आर दायित्वक निर्वहन करैत रहब। जनतब दी जे सभ सेविकाकेँ विभागीय दिशा निर्देशक आलोकमे सीडीपीओ केर अनुशंसा आर आइसीडीएसकेँ जिला परियोजना पदाधिकारी द्वारा हड़ताल आ आंदोलनमे जयबाक कारणें आमजनकेँ सेवामे बाधा पहुंचलाक कारण चयनमुक्त क देल गेल छल। जाहिमे जिलाक 36 सेविका शामिल छलीह। मुदा, बीतल 6 जनवरी केँ मुख्यमंत्रीसँ आंगनबाड़ी सेविकाक भेल वार्ताक उपरांत चयनमुक्ति आदेश केर रद्द करैत पुनः सभ सेविकाकेँ काज पर वापस लेबाक विभागीय अधिकारीकेँ निर्देश देल गेल छल। जाहिकेँ आलोकमे आइसीडीएस निदेशक ओहि दिन देर सांझमे सेवा वापसी संबंधित पत्र सभ अधिकारी सभकेँ भेज देने छलैथ।
