आंगनबाड़ी कार्यकर्ताक लेल बढ़िया खबर सामने आयल अछि। बिहारमे राज्यव्यापी विरोध प्रदर्शन भेल। पूर्वमे पुलिस विरोध प्रदर्शनकेँ नियंत्रित करय लेल महिला सभ पर पानिक बौछार करय पड़ल छल। मुदा, आब हुनका सभकेँ बहाल कऽ देल जायत।
बिहारक मुख्यमंत्री नीतीश कुमार शनिदिन कहलनि जे राज्यव्यापी हड़तालमे शामिल भेलाक बाद बर्खास्त कयल गेल १८ हजारसँ बेसी आंगनवाड़ी कार्यकर्ताक सेवा बहाल कयल जायत। कुमार ई आश्वासन आंगनवाड़ी कार्यकर्ताक एकटा प्रतिनिधिमण्डलकेँ देलनि। प्रतिनिधिमण्डल मुख्यमंत्रीसँ हुनक सरकारी आवास पर भेंट कयलक आ अनुरोध कयलक जे सरकार ‘सेविका’ आ ‘सहायिका’केँ देल जायवला मानदेय बढ़ेबा पर विचार करय। मुख्यमंत्री प्रतिनिधिमण्डलकेँ सूचित कयलनि जे हुनक सरकार समय-समय पर आंगनवाड़ी कार्यकर्तासभक मानदेयमे वृद्धि कऽ रहल अछि आ “अहाँक आग्रह पर जल्दिये एकरा उचित रूपसँ बढ़ाओल जायत।”
एहिसँ पहिने राष्ट्रीय जनता दल (राजद) कार्यालयक बाहर पैघ संख्यामे आंगनवाड़ी कार्यकर्ता विरोध प्रदर्शन कयने छलीह। कतेक बेर भीड़केँ तितर-बितर करबाक लेल पुलिसकेँ पानिक बौछार करय पड़ल । पटनाक जिलाधिकारी चन्द्रशेखर सिंह बतौलनि, “भोरे वीरचन्द पटेल पथ पर राजद मुख्यालयक बाहर पैघ संख्यामे आंगनवाड़ी कार्यकर्ता जमा भेलीह। ओ सभ यातायात के अवरुद्ध कए देलक। वीरचंद पटेल पथ विरोध प्रदर्शन लेल अधिसूचित स्थल नहिं अछि, मुदा हमर बेर-बेर आग्रहक बावजूद ओ सभ राजद कार्यालयक बाहर सड़क खाली करयसँ मना कऽ देलनि। अंततः पुलिस प्रदर्शनकारी सभकेँ तितर-बितर करबाक लेल पानिक बौछार कयलक।”
ओ कहलनि जे स्थानीय पुलिस द्वारा प्रदर्शनकारी सभक खिलाफ एफआईआर सेहो दर्ज कयल जा रहल अछि। डीएम कहलनि कि विरोध प्रदर्शनमे कियो घायल नहिं भेल छल। कोनो अप्रिय घटनाकेँ रोकबाक लेल ओतय पर्याप्त सुरक्षाकर्मी तैनात कयल गेल छल।
आंगनबाड़ी कार्यकर्ता अपन वजीफा आ सरकारी कर्मचारीक दर्जाक माँग करैत पछिला तीन दिनसँ राज्य सरकारक खिलाफ प्रदर्शन कऽ रहल छथि। मंगलदिन सेहो आंगनबाड़ी कार्यकर्ता बिहार विधानसभा लग जमा भऽ विधानसभा परिसरमे प्रवेश करबाक प्रयास कयने छलीह। पुलिस मंगलदिन आंगनबाड़ी कार्यकर्तासभकेँ तितर-बितर करबाक लेल पानिक बौछारक प्रयोग सेहो कयने छल। मुदा, राज्यव्यापी हड़ताल आब समाप्त कऽ देल गेल अछि आ १८,००० सँ बेसी बर्खास्त आंगनबाड़ी कार्यकर्ताकेँ बहाल कयल जायत।
