दसम बेर ईडी सोरेनकेँ सम्मन भेजलक

कहलक २९ सँ ३१ जनवरीक उपस्थित नहिं भेलौंह तऽ हम स्वयं आयब

*

राँची

*

ईडी एक बेर फेर झारखंडक मुख्यमंत्री हेमंत सोरेनकेँ सम्मन पठौलक अछि। हुनका ई बताबय लेल कहल गेल अछि जे ओ २९ सँ ३१ जनवरीक बीच पूछताछ लेल कहिया आ कोन स्थान पर उपलब्ध रहताह। एजेंसी सोरेनकेँ कहलक अछि जे जँ ओ सम्मनपर उपस्थित नहिं होइत छथि तँ हुनक टीम स्वयं हुनकासँ सम्पर्क करत।

उल्लेखनीय अछि जे रांचीक बड़गाई अंचलमे लगभग ८.४६ एकड़ जमीनक खरीद आ बिक्रीमे मनी लॉन्ड्रिंगसँ जुड़ल मामिलामे ईडी २० जनवरीकेँ सोरेनसँ हुनकर निवास पर लगभग सात घंटा तक पूछताछ केलक। एजेंसी एहि मामिलामे कतेको आओर बिन्दु पर आगू पूछताछ करय चाहैत अछि।

ईडी द्वारा सोरेनकेँ ई दसम सम्मन अछि। एहिसँ पहिने २२ जनवरीकेँ हुनका नवम सम्मन पठाओल गेल छल, जाहिमे हुनका २७ सँ ३१ जनवरीक बीच पूछताछ लेल समय निर्धारित करबाक लेल कहल गेल छल। एकर जवाबमे सोरेन २५ जनवरीकेँ एजेंसीकेँ अपन व्यस्तताक हवाला दैत एकटा पत्र लिखलखिन । सोरेन एहि पत्रमे ई स्पष्ट नहिं कयने छलाह जे ओ पूछताछ लेल कहिया उपलब्ध रहताह।

उल्लेखनीय अछि जे ईडी बड़गाई अंचलक भूमि घोटालामे आईएएस छवि रंजन सहित डेढ़ दर्जन लोककेँ पहिनहिं गिरफ्तार कऽ चुकल अछि। एहि मामिलामे ईडी सोरेनकेँ पहिल सम्मन पठौलक जाहिमे हुनका १४ अगस्त, २०२३ केँ उपस्थित होयबाक लेल कहल गेल छल। सोरेन एकर लिखित उत्तर देलनि आ सम्मन अवैध कहैत उपस्थित नहिं भेलाह।

एकर बादो एजेंसी हुनका सम्मन करैत रहल। सोरेन ईडीक सम्मनक विरुद्ध सर्वोच्च न्यायालय आ उच्च न्यायालयमे सेहो गेलाह, मुदा हुनका राहत नहिं भेटलनि। अंततः ईडीक आठम सम्मन पर ओ २० जनवरीकेँ पूछताछ लेल उपलब्ध रहबाक लेल सहमत भेलाह आ तखन एजेन्सीक टीम हुनक निवास पर पहुँचि पूछताछ कयलक।