भाजपाक राष्ट्रीय प्रवक्ता शहजाद पूनावाला कांग्रेस नेता मणिशंकर अय्यरक चीन पर देल गेल बयान आ कांग्रेस नेता जयराम रमेशक एहि पर स्पष्टीकरणक कड़ा आलोचना कयलनि अछि। ओ आरोप लगओलनि अछि जे, चीनसँ चंदा लऽ कऽ चीनक धंधा बढ़ाबयवाली कांग्रेस, आब चीनक प्रोपेगैंडा चला रहल अछि।
ओ आरोप लगओलनि जे कांग्रेस चीन आ पाकिस्तानक मुखपत्रक रूपमे काज कऽ रहल अछि आ एहि दुनू देशक भाषा बाजि रहल अछि। कांग्रेस पार्टीक चीनक प्रति प्रेम फेरसँ सामने आबि रहल अछि। मणिशंकर अय्यर, जे पहिल कांग्रेस परिवार अर्थात गाँधी परिवारक निकट छलाह, पहिल बेर पाकिस्तानक प्रति प्रेम देखौलनि। ई ओ व्यक्ति छथि जे पीएम मोदीकेँ हटाबय लेल पाकिस्तान गेल छलाह आ कहि रहल छलाह जे भारतकेँ पाकिस्तानसँ डरबाक चाही। लेकिन, कांग्रेस कोनो कारवाई नहिं कयलक। आब वैऽह मणिशंकर अय्यर १९६२क चीनी हमलाकेँ कथित कहि चीनकेँ क्लीन चिट दऽ रहल छथि, जे चीन, जे भारतक ३८,००० वर्ग किलोमीटर जमीनपर अवैध रूपसँ कब्जा कऽ लेने अछि, ओकरा व्हाइटवाश करैत चीनकेँ क्लीनचिट दऽ रहल छथि। ओ आरोप लगओलनि जे कांग्रेस पार्टी ई लगातार कऽ रहल अछि। ओ चीनसँ चंदा लऽ कऽ चीनक व्यवसाय चलौलनि, मनमोहन सिंह सरकारक अवधिमे भारतीय अर्थव्यवस्था आ भारतीय उद्योगकेँ नुकसान पहुँचाकऽ चीनकेँ लाभ पहुँचौलनि। भारतक अखंडतासँ समझौता कएल गेल। कांग्रेस पार्टी चीनक संग एकटा समझौता ज्ञापन पर हस्ताक्षर कयलक। डोकलामक दौरान की भेल से सभ देखलक आ कांग्रेस पार्टी सेहो आब चीनक प्रोपेगैंडा चला रहल अछि।
ओ उल्लेख कयलनि जे जयराम रमेश कहैत छथि जे मणिशंकर अय्यर एकटा वरिष्ठ नेता छथि आ ई हुनक मुँहसँ निकलल हेतैक। लेकिन, बादमे ओ अय्यरक बयानकेँ उचित ठहराबैत छथि आ गलवानमे हमर शहीद सैनिकसभक वैह आंकड़ा दऽ रहल छथि, जे चीनमे छपल छल, अर्थात चीनक प्रचार प्रसार कऽ रहल छथि।
पूनावाला कहलनि जे आइ आईएनसीक अर्थ भारतीय राष्ट्रीय कांग्रेस नहिं अछि, बल्कि ‘आई नीड चाइनीज एमओयू’ आ ‘आई नीड चाइनीज मनी’ भऽ गेल अछि।
