कांग्रेसक पश्चिम बंगाल इकाई ममता सरकारपर पार्टीक भारत जोड़ो न्याय यात्रामे बाधा उत्पन्न करबाक षड्यंत्र करबाक आरोप लगओलक अछि।
प्रदेश कांग्रेस अध्यक्ष अधीर रंजन चौधरी कहलनि जे १ फरवरीकेँ मुर्शिदाबाद जिलाक बहरामपुरक एकटा स्टेडियममे पार्टी नेता राहुल गाँधीकेँ बैसार करबाक अनुमति नहिं देब राज्य सरकारक “षड्यंत्र” छल।
चौधरी कहलनि “बहरामपुर स्टेडियममे सभाक लेल हम प्रशासनसँ अनुमति मांगने छलहुं। मुदा, एतेक काल धरि चुप रहलाक बाद प्रशासन अन्तिम क्षणमे अनुमति देबासँ मना कऽ देलक। ई स्पष्ट रूपसँ एकटा राजनीतिक षड्यंत्रक ओर इशारा करैत अछि।”
यद्यपि, टीएमसीक स्थानीय नेता अपूर्व सरकार एहि आरोपक खण्डन करैत दावा कयलनि जे बहरामपुर स्टेडियममे मुख्यमंत्रीक कार्यक्रम बहुत पहिने निर्धारित छल आ एहि घटनाक पाछाँ कोनो षड्यंत्रक प्रश्न नहिं अछि।
बृहस्पति दिन कूचबिहार जिलाक तुफानगंज उपखंडक अन्तर्गत बॉक्सिरहाटमे प्रवेश कयलाक बादसँ पश्चिम बंगालमे न्याय यात्रा रैलीमे प्रशासनिक बाधाक बात कहल गेल अछि।
बृहस्पति कऽ राहुल गाँधीक स्वागतक लेल बनाओल गेल मंचकेँ पुलिसक आपत्ति भेलाक बाद ध्वस्त कऽ वैकल्पिक स्थान पर ठाढ़ करय पड़ल। ओकर बाद सिलीगुड़ी महानगर पुलिस २८ जनवरीकेँ सिलीगुड़ी शहरमे राहुलक जनसभाक अनुमति देबासँ मना कऽ देलक।
प्रदेश कांग्रेसक नेता लोकनि कहलनि जे जिला पुलिस अधिकारीक अनुरोधक बाद जलपाईगुड़ी शहरमे न्याय यात्राक कार्यक्रममे सेहो किछु हद धरि बदलाव करय पड़त।
