बिहारक पूर्व मुख्यमंत्री कर्पूरी ठाकुरकेँ भारत रत्न देबाक निर्णयक बाद आब एकर श्रेय लेबाक लेल राजनीतिक दलक बीच प्रतिस्पर्धा चलि रहल अछि। भाजपाक प्रतिद्वंद्वी दल राजद आ जेडीयू अपन पुरान माँगक हवाला दैत एकर श्रेय लेबाक प्रयास कऽ रहल अछि, जखन कि भाजपा नेता नरेन्द्र मोदीक सरकारकेँ पिछड़ाक सम्मानसँ जोड़ि श्रेय दऽ रहल छथि।
भाजपा नेता सभ कहि रहल छथि जे जँ राजद एतेक दिन सरकारमे छल तखन भारत रत्न किएक नहिं देल जा सकल। राजद नेता आ उपमुख्यमंत्री तेजस्वी यादव बुधदिन कहलनि जे हम बहुत दिनसँ एकर मांग करैत आबि रहल छी। हमरा खुशी अछि जे पूर्व मुख्यमंत्री कर्पूरी ठाकुरकेँ मरणोपरांत भारत रत्न देबाक घोषणा कयल गेल अछि। एकर प्रभाव राजनीतिक रूपसँ सेहो देखल जाएत। ओ कहलनि “हमर मांग पूरा भए गेल अछि।” तेजस्वी यादव कहलनि जे बिहारमे जातिगत जनगणना रिपोर्ट जारी भेलाक बाद जनसंख्याक संख्या सामने अयलाक बादे भारत सरकार ई निर्णय लेबा लेल मजबूर भेल।
एम्हर बिहारक मुख्यमंत्री आ जदयू नेता नीतीश कुमार निश्चित रूपसँ एकरा जेडीयू के पुरान मांगक पूर्ति कहैत छथि, मुदा एहि लेल प्रधानमंत्रीकेँ धन्यवाद देब नहि बिसरैत छथि।
ओ एक्स पर लिखलनि जे “पूर्व मुख्यमंत्री आ महान समाजवादी नेता स्वर्गीय कर्पूरी जीकेँ देशक सर्वोच्च सम्मान ‘भारत रत्न’ देल जायब हार्दिक प्रसन्नताक बात अछि। ई केंद्र सरकारक नीक निर्णय अछि। ठाकुर जीकेँ हुनक १००म जयन्ती पर देल जायवला सर्वोच्च नागरिक सम्मान दलित, वंचित आ उपेक्षित वर्गमे सकारात्मक भावना उत्पन्न करत। हम सभ सदैव कर्पूरी ठाकुर जीकेँ ‘भारत रत्न’ देबाक माँग करैत आबि रहल छी। बरखक पुरान माँग आइ पूरा भेल अछि। एकरा लेल प्रधानमंत्री नरेन्द्र मोदीकेँ धन्यवाद।”
भाजपाक प्रदेश अध्यक्ष सम्राट चौधरी कहलनि अछि जे “पिछड़ाक मसीहा जननायक कर्पूरी ठाकुरकेँ जन्म शताब्दी पर भारत रत्न देबाक निर्णय कए प्रधानमंत्री नरेन्द्र मोदी बिहार आ देशक करोड़ों पिछड़ा जनताक सम्मानित कयलनि अछि।”
ओ जननायककेँ मरणोपरांत भारत रत्नसँ सम्मानित करबाक केन्द्र सरकारक निर्णय लेल प्रधानमंत्रीकेँ धन्यवाद देलनि आ कहलनि जे ‘सबका साथ, सबका विकास’ केर अभियानसँ ओ कर्पूरी ठाकुरक सपना साकार कऽ रहल छथि।
ओ कहलनि अछि जे पिछड़ा वर्गसँ आबयवला मोदी पिछड़ाक दर्द बुझि चुकल छथि। केन्द्र सरकारक सभ कल्याणकारी योजनाक केन्द्रमे पिछड़ल समाज अछि।
एकटा प्रश्नक उत्तर मे ओ बिना कोनो नाम लेलनि कहलनि जे केंद्रक सत्तामे ई सभ मुख्य भूमिकामे छलाह, तखन कर्पूरी जीकेँ ई सम्मान किएक नहिं भेटि सकल। ओ सभ मात्र अपन राजनीतिक रोटी सेंकैत छथि।
