पीएमकेँ आइ बिहारक औरंगाबाद आ मिथिला क्षेत्रक बेगुसराय दौरा
*
पटना
*
प्रधानमंत्री नरेन्द्र मोदी आइ एक दिनक बिहार दौरा पर रहताह। बिहारमे होलीसँ पहिने राज्यक जनताकेँ कतेको उपहार देल जायत। प्रधानमंत्रीक आगमनकेँ लऽ कऽ भाजपामे बड्ड उत्साह अछि।
प्रधानमंत्री सबसँ पहिने औरंगाबाद पहुंचताह, जतय ओ २१,४०० करोड़ टाकासँ बेसीक कतेको विकास परियोजनाक उद्घाटन, लोकार्पण आ शिलान्यास करताह।
प्रधानमंत्री गंगा नदी पर छह लेनक पुलक आधारशिला सेहो रखताह, जकरा पटना रिंग रोडक हिस्साक रूपमे विकसित कयल जायत। ई पुल देशक सबसँ नमगर नदी पुलमेसँ एक होयत।
प्रधानमंत्री नमामि गंगे केर तहत लगभग २,१९० करोड़ टकाक लागतसँ बिहारमे विकसित १२ परियोजनाक उद्घाटन सेहो करताह। प्रधानमंत्री पटनामे यूनिटी मॉलक शिलान्यास सेहो करताह। २०० करोड़ टाकासँ बेसी लागतसँ बनयवला एहि परियोजनाक परिकल्पना एकटा अत्याधुनिक सुविधाक रुपमे कयल गेल अछि, जाहिमे अन्तर्राष्ट्रीय डिजाइन व्यवहार, प्रौद्योगिकी, सुविधा आ सौन्दर्यीकरण शामिल अछि। ई मॉल राज्य, केंद्र शासित प्रदेश आ जिलाकेँ एकटा समर्पित स्थान प्रदान करत, जाहिमे ओकर अद्वितीय उत्पाद आ शिल्प कौशलक प्रदर्शन होयत।
बिहारक प्रत्येक जिलाक लेल ३८ टा छोट स्टाॅल आ राज्य ओ केंद्र शासित प्रदेशक लेल ३६ टा पैघ स्टॉल रहत।
प्रधानमंत्री मोदी बिहारमे तीनटा रेल परियोजना सेहो राष्ट्रकेँ समर्पित करताह। प्रधानमंत्री मिथिला क्षेत्रीय बेगूसरायमे कतेको योजनाक उद्घाटन आ शिलान्यास सेहो करताह। आजुक दिन प्रधानमंत्री लगभग १.४८ लाख करोड़ टाकाक कतेको तेल आ गैस परियोजनाक उद्घाटन, लोकार्पण आ शिलान्यास करताह।
