मुकेश अम्बानी एक बेर फेर सबसँ धनी व्यक्ति बनि गेल छथि। ब्लूमबर्ग बिलेनियर्स इंडेक्स २०२३क अनुसार, मुकेश अम्बानी गौतम अडानीकेँ पछाड़ि सबसँ धनी भारतीयक उपाधि फेरसँ प्राप्त कऽ लेने छथि। रिपोर्टक अनुसार, अम्बानीक कुल सम्पत्ति ५३.६ करोड़ डॉलर वा लगभग ४५०० करोड़ रुपैया बढ़ि गेल अछि आ एहिसँ ई बढ़ि कऽ ९७.५ अरब डॉलर भऽ गेल अछि। धनक एहि आंकड़ाक सङ्ग ओ दुनियाक शीर्ष धनीलोकनिक सूचीमे एक स्थान चढ़ि गेल छथि आ आब १२म स्थान पर पहुँचि गेल छथि। एकर संगहि एशियाक सबसँ धनी व्यक्तिक मुकुट सेहो हुनक माथ पर सजाओल गेल अछि।
जनतब ई जे शनि दिन शेयरमे बढ़ोत्तरीक कारण बढ़ल नेट वर्थक कारण अडानी ग्रुपक अध्यक्ष गौतम अडानी एशियाक सबसँ अमीर व्यक्ति बनि गेल छलाह, मुदा पिछला २४ घंटामे जे नुकसान भेल अछि ओकर बाद ई ताज एक बेर फेर मुकेश अंबानीक माथकेँ सजेने अछि।
अडानी-हिंडनबर्ग मामिलामे सुप्रीम कोर्टक फैसलाक बाद गौतम अडानीक शेयर बाजारमे लिस्टेड कम्पनी सभक शेयरकेँ तेजी भेटि रहल छल। शनि दिन हुनकर कुल सम्पत्ति बढ़ि कऽ ९७.६ अरब डॉलर भऽ गेल। मुदा रविदिन समाचार लिखबा धरि हुनका ३.०९ अरब डॉलर (लगभग २५,००० करोड़ रुपया) के घाटा भेल छल आ ओ धनक सूचीसँ दू स्थान नीचा आबि गेल छथि। जँ हम दुनू भारतीय अरबपतिक सम्पत्तिमे अन्तर देखब तखन हुनक कुल सम्पत्तिमे ३ अरब डॉलरक अन्तर अछि।
ब्लूमबर्ग बिलेनियर्स इंडेक्सक अनुसार, एलन मस्क दुनियाक सबसँ धनी व्यक्ति बनल छथि। हुनकर कुल सम्पत्ति 219 अरब डॉलर अछि। अमेजनक जेफ बेजोस अमीर लोकक सूचीमे दोसर स्थान पर छथि आ हुनकर संपत्ति १७० अरब डॉलर अछि। फ्रांसक अरबपति बर्नार्ड अर्नाल्ट १६७ अरब डॉलरक कुल सम्पत्तिक सङ्ग दुनियाक तेसर सबसँ धनी व्यक्ति छथि।
