सी. एम. साइंस कालेज, दरभंगामे “बौद्धिक संपदा आ रसायन शास्त्रमे नवीकरण” विषय पर दू दिवसीय अंतरराष्ट्रीय संगोष्ठी केर आयोजन आगामी 25 आ 26 जुलाईकें होयत।
जानकारी दैत संगोष्ठी केर संयोजक सह महाविद्यालयक प्रधानाचार्य प्रो. दिलीप कुमार चौधरी मंगलदिन बतेलनि जे महाविद्यालयक नवीनीकृत कामेश्वर भवनमे आयोजित होमय बला संगोष्ठीमे यूनिवर्सिटी ऑफ सेंट्रल फ्लोरिडा, दिसंबर्ग यूनिवर्सिटी जर्मनी, यूनिवर्सिटी ऑफ अल कदेशिया इराक आ जम्मू केंद्रीय विश्वविद्यालयक विषय विशेषज्ञक व्याख्यान ऑनलाइन मोडमे होयत। जखन कि अन्य आमंत्रित शिक्षक लोकनिक व्याख्यान आ शोधार्थी लोकनि द्वारा मौखिक प्रस्तुति केर प्रावधान ऑफलाइन मोडमे कयल गेल अछि।
संगोष्ठी केर आयोजन सचिव डा. विश्व दीपक त्रिपाठी बतेलनि जे ई संगोष्ठी बौद्धिक संपदा ओ रासायनिक नवीनीकरणक क्षेत्रमे छात्रक लेल उपयोगी नूतन विचार कें साझा करबा लेल एकटा महत्वपूर्ण मंच होयत, जे नवाचार पद्धतिमे एकटा मीलक पाथर साबित होयत।
