बिहारक मुख्यमंत्री नीतीश कुमार पटना हवाई अड्डाक नव टर्मिनलक निरीक्षणक क्रममे अधिकारी सभकेँ निर्माण शीघ्र पूरा करबाक निर्देश देलनि। बैसारमे योजना पर विस्तारसँ चर्चा भेल।
मुख्यमंत्री नीतीश कुमार बुधकेँ पटनाक जय प्रकाश नारायण अन्तर्राष्ट्रीय हवाई अड्डाक निर्माणाधीन टर्मिनलक निरीक्षण कयलनि आ अधिकारी सभकेँ शेष काज जल्दिये पूरा करबाक निर्देश देलनि। निरीक्षणक दौरान मुख्यमंत्री हवाई अड्डाक विस्तार कार्यक बारेमे विस्तृत जानकारी लेलनि आ आवश्यक दिशा-निर्देश देलनि। जय प्रकाश नारायण अन्तर्राष्ट्रीय हवाई अड्डाक समीक्षा कक्षमे विस्तार कार्यसँ सम्बन्धित समीक्षा बैसार भेल। समीक्षा बैसारमे हवाई अड्डाक अधिकारी लोकनि प्रस्तुतिक माध्यमसँ मुख्यमंत्रीकेँ हवाई अड्डाक विस्तारक मास्टर प्लानक विस्तृत जानकारी देलनि।
समीक्षाक दौरान मुख्यमंत्री नीतीश कहलनि कि पटना हवाई अड्डा पर बेहतर सुविधाक लेल विस्तारीकरणक तहत जे किछु काज जरूरी अछि, से कयल जा रहल अछि। पटना हवाई अड्डा पर हवाई जहाज के सुचारू आवाजाहीक लेल विस्तारक काज जल्दिये पूरा कयल जाय। राज्य सरकारसँ जतेक मददक जरूरत पड़त, ओकरा देल जायत। हवाई अड्डा परिसरक जल निकासीक लेल नीक व्यवस्था करू आ हवाई अड्डासँ कनेक्टिविटी केर आर निक बनाउ, जाहिसँ लोक कमसँ कम समयमे एतय पहुँचि सकय।
निरीक्षणक दौरान उप मुख्यमंत्री सम्राट चौधरी, उप मुख्यमंत्री विजय कुमार सिन्हा, जल संसाधन आ संसदीय कार्य मंत्री विजय कुमार चौधरी सहित कतेको मंत्री आ अधिकारी उपस्थित छलाह। संगहि नीतीश कुमार विधानसभा चुनावसँ पहिने कतेको निर्माण कार्य पूरा करय चाहैत छथि। एहिमे पटनाक मेट्रोक काज सेहो अछि। पीएमसीएच परियोजना सेहो निर्माणाधीन अछि। ओना एकरा पूरा करबामे समय लागत, मुदा मुख्यमंत्री नीतीश कुमार हर काज समयसँ पहिने करबा लेल प्रतिबद्ध बुझाइत छथि।
