1 जुलाईसँ आधार, पासपोर्ट आ एलपीजीक दाममे बदलाव
नई दिल्ली। समदिया
नव मास शुरू होमयमे मात्र किछु दिन बाँकी अछि। भारतीय यूनिक आइडेंटिफिकेशन अथॉरिटी (यूआईडीएआई) घोषणा कयलक अछि जे जँ अहां अपन आधार रिकॉर्डमे अपन ईमेल आईडी अपडेट करय चाहय छी तँ 1 जुलासँ 31 दिसंबरकेँ बीच निःशुल्क कय सकय छी। पहिने आधारमे कोनो ईमेल पता अपडेट करबा लेल ₹75 शुल्क लेल जाइत छल। एहि कदमक माध्यमसँ आधार प्रबंधन निकाय यूआईडीएआई केर मकसद अछि जे लोककेँ अपन नवीनतम जानकारी अपडेट करबा लेल प्रोत्साहित कयल जाय।
आब 1 जुलाईसँ पासपोर्टक लागत ₹1500 केर जगह ₹2500 होएत। एम्हर, ‘तत्काल’ पासपोर्टक शुल्क बढ़ि कय ₹5,000 भ जायत, जे पहिने ₹3,500 छल। ई नव शुल्क 1 जुलाईसँ लागू भ रहल अछि। कतेको वाहन निर्माता कंपनी 1 जुलाईसँ दाम बढ़ेबाक घोषणा कयने अछि। एहिमे टाटा मोटर्स, किया मोटर्स, एमजी मोटर आ बीएमडब्ल्यू शामिल अछि। टाटा मोटर्स पैसेंजर व्हीकल्स अपन गाड़ी पर 1.5% धरि दाम बढ़ेबाक घोषणा कयलक अछि।
तहिना टाटा मोटर्स कमर्शियल व्हीकल्स सेहो 2.5% धरि दाम बढ़ेबाक घोषणा कयलक अछि। एकर अलावा किया मोटर्स आ बीएमडब्ल्यू 2-2% केर दाम बढ़ाबय केर घोषणा कयलक, जखनि कि एमजी मोटर 3% धरि केर बढ़ोत्तरीक घोषणा कयलक। संगहि, कतेको क्रेडिट कार्डक संबंधमे नियम 1 जुलाईसँ बदलय वला अछि।
खबरि केर अनुसार एसबीआई कार्ड चुनिंदा ‘फोनपे एसबीआई कार्ड’ लेल रिवार्ड पॉइंट संरचनामे संशोधन कयलक। नव सीमा लगाओल गेल अछि आ किछु लेनदेनकें रिवार्ड पॉइंट श्रेणीसँ बाहर राखल गेल अछि। एम्हर, एचडीएफसी रेगालिया गोल्ड क्रेडिट कार्डधारक आब हर कैलेंडर तिमाहीमे तीन बेर घरेलू हवाई अड्डा लाउंजमे मुफ्तमे प्रवेश कय सकैत छथि, तथापि एही लाभकें लाभ उठावय लेल, ओकरा न्यूनतम ₹60,000 प्रति तिमाही खर्च करनाय आवश्यक अछि। सरकार सभ महीनाक शुरुआतमे एलपीजीक दामक समीक्षा करैत अछि, फलस्वरूप 1 जुलाईकेँ एलपीजीक दाममे सेहो बदलाव भ सकैत अछि।
