जस्टिस बीआर गवई काल्हि बुध दिन भारतक 52म मुख्य न्यायाधीशक रूपमे शपथ लेलनि। प्रधानमंत्री नरेंद्र मोदी जस्टिस बीआर गवईकेँ बधाई देलनि आ हुनका कार्यकालक लेल शुभकामना सेहो देलनि।
प्रधानमंत्री नरेंद्र मोदी एक्स पर एकटा पोस्ट शेयर कए लिखलनि, “भारतक सर्वोच्च न्यायालयक मुख्य न्यायाधीशक रूपमे जस्टिस भूषण रामकृष्ण गवई’क शपथ ग्रहण समारोहमे शामिल भेलहुं। हुनका कार्यकालक लेल शुभकामना।”
राष्ट्रपति द्रौपदी मुर्मू बुध दिन भोरमे राष्ट्रपति भवनमे जस्टिस बीआर गवईकेँ भारतक 52म सीजीआईक रूपमे शपथ दियेलनि। राष्ट्रपति कार्यालय द्वारा एक्स खाता पर तस्वीर सेहो साझा कयल गेल। एक्स पर लिखल गेल, “न्यायमूर्ति भूषण रामकृष्ण गवई राष्ट्रपति भवनमे भारतक सर्वोच्च न्यायालय केर मुख्य न्यायाधीशक रूपमे शपथ लेलनि।” एतबे नहि, उपराष्ट्रपति कार्यालय सेहो एक्स पर तस्वीर साझा करैत लिखलक, उपराष्ट्रपति जगदीप धनखड़ आई राष्ट्रपति भवनमे भारतक 52म माननीय मुख्य न्यायाधीशक रूपमे न्यायमूर्ति भूषण रामकृष्ण गवईकेँ शपथ ग्रहण समारोहमे उपस्थित रहलथि।
जनतब जे पूर्व सीजीआई संजीव खन्नाक कार्यकाल 13 मईकेँ समाप्त भऽ गेल छल। हुनकर कार्यकाल केवल सात महीनाकेँ छल। गवई देशक दोसर दलित मुख्य न्यायाधीश छथि। हुनकासँ पहिनहि जस्टिस के. जी. बालाकृष्णन एहि पद पर आसीन रहि चुकल छथि। जस्टिस बालाकृष्णन साल 2007मे सुप्रीम कोर्टक चीफ जस्टिस बनल छलाह। उच्चतम न्यायालयक आधिकारिक वेबसाइट पर देल गेल जनतबक अनुसार, न्यायमूर्ति भूषण रामकृष्ण गवईक जन्म 24 नवंबर 1960 केँ महाराष्ट्रक अमरावतीमे भेल। ओ 16 मार्च 1985केँ वकालतक दुनियामे कदम रखलनि आ शुरुआतमे दिवंगत राजा एस. भोंसले, जे पूर्व महाधिवक्ता आ उच्च न्यायालयक न्यायाधीश रहि चुकल छथि, संग काज कएलनि। वर्ष 1987 सँ 1990 तक ओ बॉम्बे उच्च न्यायालयमे स्वतंत्र वकालत कएलनि आ तकर बाद मुख्य रूपसँ नागपुर पीठक समक्ष विभिन्न मामिला सभकेँ पैरवी करैत रहलाह।
