आम आदमी पार्टीक विधायक दिल्ली विधानसभा परिसरक बाहर बैसि भारतीय जनता पार्टी सरकारक खिलाफ विरोध प्रदर्शन कयलनि। ‘आप’क विधायकसभक आरोप अछि जे भारतीय लोकतंत्रक इतिहासमे पहिल बेर निर्वाचित विधायकसभकेँ विधानसभा परिसरमे प्रवेश करबासँ रोकल जा रहल अछि।
‘आप’क विधायक विधानसभा गेटक बाहर बैसल छलाह, जतय ओ भाजपा पर तानाशाहीक आरोप लगबैत कहलनि जे पुलिस हुनका कोनो वैध आदेश नहि देखौलक। पार्टीक नेताक कहब छनि जे पुलिस मात्र हुनका रोकबाक आदेशक हवाला देलक, मुदा हुनका कोनो आधिकारिक आदेश नहि देखाओल गेल।
‘आप’क विधायक बतौलनि जे जखनि ओ “जय भीम”क नारा देलनि तखनि हुनका विधानसभा परिसरसँ निष्कासित कऽ देल गेल। पार्टी आरोप लगओलक जे भाजपा बाबासाहेब भीमराव अम्बेडकरसँ घृणा करैत अछि आ हुनकर नाम आ छविकेँ तुच्छ मानैत अछि। ‘आप’क नेताक कहब छनि जे ई पूरा घटना भाजपाक अत्याचारकेँ उजागर करैत अछि, जे लोकतांत्रिक अधिकारक उल्लंघन कऽ रहल अछि।
एहि मामिलामे आम आदमी पार्टी दिल्ली विधानसभा अध्यक्ष आ दिल्ली पुलिसक खिलाफ कड़ा प्रतिक्रिया व्यक्त कयलक अछि। ‘आप’ आरोप लगओलक जे भाजपा बाबासाहेब अम्बेडकरक विचार आ योगदानसँ घृणा करैत अछि आ हुनकर छवि नष्ट करबाक प्रयास कऽ रहल अछि। एहि घटनाकेँ लोकतंत्रक विरुद्ध एकटा आओर डेगक रूपमे देखल जा रहल अछि।
उल्लेखनीय अछि जे दिल्ली विधानसभा सत्रक दोसर दिन हंगामाक कारण आम आदमी पार्टीक कतेको विधायककेँ तीन दिनक लेल निलम्बित कऽ देल गेल छल। विधायकसभक कहब छनि जे जँ ओ विधानसभाक भीतर घरमे प्रवेश नहि कऽ सकैत छथि तँ हुनका निश्चित रूपसँ परिसरमे प्रवेश करबाक अनुमति अछि, मुदा भाजपा आ दिल्ली पुलिस अपन अत्याचारी रवैयाक कारण हुनका विधानसभा परिसरमे प्रवेश करबासँ रोकि रहल अछि।
