केन्द्रीय कृषि मंत्री शिवराज सिंह चौहान कहलनि जे झारखण्डमे एनआरसी लागू कयल जायत। नागरिकताक रजिस्टर बनाओल जाएत। विदेशी घुसपैठियाकेँ बाहर निकलय के रास्ता देखाओल जाएत। झारखण्डमे भाजपाक विस्तृत संकल्प पत्र जल्दिये आबि रहल अछि।
सोमदिन मीडियासँ बातचीत करैत भाजपाक झारखंड प्रभारी शिवराज सिंह चौहान कहलनि जे ई चुनाव मात्र मुख्यमंत्री बनेबाक लेल वा कोनो पार्टीकेँ सत्ता देबाक लेल नहिं अछि, बल्कि झारखण्डकेँ बचाबय लेल अछि। बेटी, माटि आ रोटीक रक्षा करब हमर संकल्प अछि।
ओ कहलनि जे बांग्लादेशी घुसपैठियाक कारण झारखण्डक जनसांख्यिकी बदलि रहल अछि। संथाल परगनामे जनजातीय जनसंख्या ४४ प्रतिशतसँ घटि २८ प्रतिशत रहि गेल अछि। बांग्लादेशी घुसपैठियाक कारण हिन्दू आबादी सेहो प्रभावित भेल अछि।
ओ आरोप लगओलनि जे वोट बैंकक लालचमे हेमंत सोरेन आ गठबंधन सरकार घुसपैठियाकेँ सुरक्षा दऽ रहल अछि। घुसपैठियाक आधार कार्ड आ मतदाता पहचान पत्र बनाओल जा रहल अछि, ई देशक लेल पैघ खतरा अछि। आदीवासी बेटीकेँ भ्रमक जालमे फँसाकय, हुनकासँ वियाह कय जमीन पर कब्जा कयल जा रहल अछि।
