बिहारकेँ प्रोडक्शन स्टेट बनेबाक तैयारी, सभ जिलामे लागत उद्योग : संजय सरावगी

दरिभंगा।  समदिया

बिहार भाजपाक प्रदेश अध्यक्ष संजय सरवागीक अनुसारे बिहारमे जल्दिये काफी बदलाव होएत। राज्यक सभ जिलामे उद्योग स्थापित करबाक तैयारी चलि रहल अछि आ सरकार बिहारकेँ उपभोक्ता राज्यसँ उत्पादक राज्यमे बदलबा लेल तेजीसँ काज कय रहल अछि। ओ कहलनि जे बिहारक 14.5 करोड़ आबादी राज्यक सबसँ पैघ ताकत आ संपत्ति अछि।

दरिभंगा स्थित अपन आवास पर मीडियासँ गप्प करैत संजय सरवागी कहलनि जे मुख्यमंत्री सम्राट चौधरीक दिल्ली यात्राक प्राथमिक उद्देश्य बिहारमे जारी विकास परियोजनाकेँ नव गति देबाक अछि। ओ कहलनि जे, मुख्यमंत्री दिल्लीमे वरिष्ठ अधिकारी आ केंद्रीय मंत्रीसँ भेंट कय बिहारक लेल अधिकतम समर्थन आ निवेश आकर्षित कय रहल छथि, जाहिसँ राज्यक विकासमे तेजी आबि रहल अछि। ओ कहलनि जे प्रधानमंत्री नरेंद्र मोदीक सपना अछि जे 2047 धरि भारत विकसित देशक पंक्तिमे शामिल भ जाय, इ सपना बिहारक विकासक बिना पूरा नहि भ सकैत अछि। मुख्यमंत्री सम्राट चौधरी सेहो बिहारक विकासक एहि लक्ष्यकेँ दिशामे काज कय रहल छथि।

संजय सरावगी कहलनि कि मुख्यमंत्री सम्राट चौधरीकेँ उपराष्ट्रपति सीपी राधाकृष्णनसँ भेंट करबाक कार्यक्रम पहिनेसँ तय छल, ओ कहलनि जे मुख्यमंत्रीक पूरा यात्रा बिहारक विकास आ निवेश बढ़ेबा पर केंद्रित छल। ओ दावा केलथि जे आगामी समयमे बिहारक सभ जिलामे उद्योगक स्थापना कयल जायत। एहिसँ राज्य आर्थिक रूपसँ मजबूत होएत आ पैघ पैमाना पर रोजगार सेहो भेटत। ओ कहलनि जे बिहारमे जल्द पैघ उद्योगक स्थापना होएत आओर एहि दिशामे काज तेजीसँ आगू बढ़ि रहल अछि। सरकार चाहैत अछि जे बिहार आर्थिक रूपसँ समृद्ध होय आ राज्यमे पैघ पैमाना पर औद्योगिक विकासक गवाह बनय।

संजय सरावगी कहलनि जे पूर्व मुख्यमंत्री नीतीश कुमार बिहारकेँ जंगलराजसँ मुक्त कय सुशासन स्थापित केलथि। आब मुख्यमंत्री सम्राट चौधरीक नेतृत्वमे बिहार सुशासनसँ आर्थिक समृद्धि दिस बढ़ि रहल अछि। ओ कहलनि जे बिहारमे समृद्धि अनबा लेल पैघ उद्योगक स्थापना कयल जाएत।

ओ कहलनि कि प्रधानमंत्री नरेंद्र मोदी चाहैत छथि कि बिहार जल्दी विकसित राज्यक पंक्तिमे शामिल होय आ सरकार लगातार एही दिशामे काज कय रहल अछि। संजय सरवागी उद्योगपति गौतम अदानीक हालमे बिहार यात्राक जिक्र सेहो केलथि। ओ कहलनि जे पहिने जखन पैघ उद्योगपति बिहार जाइत छलाह तँ गयाजी जाइत छलाह आ अपन पूर्वज लेल पिंड दान आ श्रद्धांजलि समारोह करैत छलाह, मुदा आब स्थिति बदलि रहल अछि। ओ कहलनि जे एशियाक प्रमुख उद्योगपति गौतम अदानी मुख्यमंत्रीसँ भेंट कयलनि आ प्रेस ब्रिफिंगक दौरान बिहारमे 60 सँ 70 हजार करोड़ रुपयाक निवेशक गप्प केलथि। ओ कहलनि जे भविष्यमे आओर पैघ निवेशक बिहारमे आओत।

संजय सरावगी कहलनि जे बिहारसँ मजदूरक पलायनमे कमी आयल अछि। ओ दावा कयलनि जे भविष्यमे दोसर राज्यक लोक रोजगारक लेल बिहार आओत। ओ कहलनि जे बिहारक 14.5 करोड़ आबादी राज्यक सबसँ पैघ ताकत अछि। बिहार एखन उपभोक्ता राज्य अछि, मुदा सरकार एकरा उत्पादक राज्यमे बदलबा लेल संकल्पित अछि। राज्यकेँ आर्थिक रूपसँ समृद्ध बनेबा लेल तेजीसँ काज भ रहल अछि।