धनतेरसक पावन अवसर पर बिहारक मुख्यमंत्री नीतीश कुमार राज्यक किसानक हितक लेल एकटा विशेष उपहार देलनि। ओ पटना १, अने मार्गसँ रबी महाअभियान-२०२४-२५ शुरू कयलनि। एहि विशेष अवसर पर ओ किसान जागरूकता वाहनकेँ झंडी देखा कऽ रवाना कयलनि। कार्यक्रमक दौरान चारिटा कृषि ज्ञान वैन आ १८टा किसान जागरूकता वाहनकेँ झंडी देखा कऽ रवाना कयल गेल। कार्यक्रमक दौरान कृषि विभागक सचिव संजय कुमार अग्रवाल मुख्यमंत्रीक स्वागत करैत हरित पौधा भेंट कयलनि।
मुख्यमंत्री कहलनि जे रबी महाअभियान किसानक लेल क्रांतिकारी साबित होबय जा रहल अछि। एकर माध्यमसँ किसानकेँ चारिम कृषि रोड मैपक कतेको आयाम केर जानकारी देल जायत। मुख्यमंत्री कहलनि जे एहि अभियानमे किसानकेँ रबी मौसमसँ जुड़ल कृषि विभाग द्वारा संचालित योजनाक जानकारी देल जाएत।
मुख्यमंत्री नीतीश कुमार कहलनि जे रबी महाअभियान-2024-25 सँ किसान सभकेँ जागरूक कयल जायत। किसानसभकेँ फसिलक अवशेषक प्रबंधन आ खेतमे फसिलक अवशेष जरलासँ माटि आ पर्यावरणकेँ भेल क्षतिक विषयमे विस्तारसँ जानकारी देल जायत। किसानसभकेँ रबी फसलक तकनीकी जानकारी, जैविक खेतीकेँ बढ़ावा देब, मौसमक अनुकूल कृषि कार्यक्रम आ फसल विविधीकरणसँ सम्बन्धित जानकारी देल जायत।
एहि अवसर पर उपमुख्यमंत्री सम्राट चौधरी, उपमुख्यमंत्री विजय कुमार सिन्हा, जल संसाधन मंत्री विजय कुमार चौधरी, कृषि मंत्री मंगल पाण्डेय, बिहार राज्य आपदा प्रबंधन प्राधिकरणक उपाध्यक्ष डॉ. उदय कान्त, मुख्यमंत्रीक प्रमुख सचिव दीपक कुमार, मुख्य सचिव अमृतलाल मीणा, विकास आयुक्त प्रत्यय अमृत, मुख्यमंत्रीक प्रधान सचिव डॉ. एस. सिद्धार्थ, कृषि विभागक सचिव संजय कुमार अग्रवाल उपस्थित छलाह। मुख्यमंत्रीक सचिव अनुपम कुमार, मुख्यमंत्रीक सचिव कुमार रवि, मुख्यमंत्रीक विशेष कर्तव्य अधिकारी गोपाल सिंह सहित अन्य वरिष्ठ अधिकारी सेहो उपस्थित छलाह।
