बिहार मंत्रिमंडलक 17 प्रस्ताव पर मुहर, 16 मेडिकल कॉलेज, 19 विशेष न्यायालय आ स्पोर्ट्स साइंस सेंटरक बाट प्रशस्त
पटना। समदिया
मुख्यमंत्री सम्राट चौधरीक अध्यक्षतामे बुधदिन सम्पन्न बिहार मंत्रिमंडलक बैठकमे राज्यक स्वास्थ्य, शिक्षा, न्याय, खेल आ आधारभूत संरचनाक सुदृढ़ीकरण लेल 17 महत्वपूर्ण प्रस्तावक स्वीकृति देल गेल। मंत्रिमंडलक निर्णयसभसँ राज्यमे विकासक नव चरणक शुरुआत होएबाक आशा व्यक्त कएल जा रहल अछि।
पीपीपी मॉडल पर चलत 16 मेडिकल कॉलेज
राज्यक स्वास्थ्य सेवाकेँ आधुनिक बनेबाक उद्देश्यसँ 16 मेडिकल कॉलेज आ अस्पतालक संचालन पब्लिक-प्राइवेट पार्टनरशिप (PPP) मॉडल पर करबाक निर्णय लेल गेल अछि। एकरा लेल पीडब्ल्यूसी (PWC) केँ ट्रांजैक्शन एडवाइजर नियुक्त करबाक स्वीकृति सेहो देल गेल। सरकारक मानब अछि जे एहिसँ अत्याधुनिक स्वास्थ्य सुविधा उपलब्ध होयत आ मरीजसभकेँ बेहतर उपचार भेटत।
पीपराकोठीमे खुलत केंद्रीय विद्यालय
पूर्वी चम्पारण जिलाक पीपराकोठीमे केंद्रीय विद्यालय स्थापनाक बाट सेहो साफ भऽ गेल अछि। एहि लेल केंद्र सरकारकेँ 30 वर्षक लीज पर भूमि उपलब्ध कराओल जाएत। विद्यालय खुललासँ क्षेत्रक छात्र-छात्रासभकेँ गुणवत्तापूर्ण केंद्रीय विद्यालय शिक्षा प्राप्त होएत।
19 नव विशेष न्यायालयक गठन
अनुसूचित जाति-जनजाति अत्याचार निवारण अधिनियमसँ जुड़ल मामिलाक शीघ्र सुनवाइ सुनिश्चित करबाक लेल राज्यमे 19 नव विशेष न्यायालय स्थापित कएल जाएत। एकर संगहि 171 नव पदक सृजनक स्वीकृति सेहो देल गेल अछि।
राजगीरमे अत्याधुनिक स्पोर्ट्स साइंस सेंटर
राजगीर स्पोर्ट्स अकादमीमे अत्याधुनिक स्पोर्ट्स साइंस सेंटर आ हाई-परफॉर्मेंस ट्रेनिंग सेंटर स्थापित कएल जाएत। एकर केंद्रमे खेलाड़ीसभकेँ वैज्ञानिक प्रशिक्षण, प्रदर्शन विश्लेषण आ खेलक दौरान होबयवला चोटक आधुनिक उपचारक सुविधा उपलब्ध रहत।
‘हर घर तिरंगा’ अभियानकेँ मंजूरी
वर्ष 2026क ‘हर घर तिरंगा’ अभियानक आयोजन लेल सेहो मंत्रिमंडल स्वीकृति प्रदान कएलक। अभियानक माध्यमसँ राष्ट्रीय ध्वजक सम्मान आ राष्ट्रभक्तिक भावना जन-जन धरि पहुँचेबाक प्रयास कएल जाएत।
मुंगेर-जमालपुरमे पेयजल योजनाकेँ गति
अमृत 2.0 योजनाक अंतर्गत जमालपुर जलापूर्ति परियोजना लेल 102.22 करोड़ रुपैया आ मुंगेर जलापूर्ति परियोजना लेल 177.72 करोड़ रुपैयाक स्वीकृति देल गेल अछि। एहि योजनासभ केर पूरा भेला पर दुनू शहरमे स्वच्छ आ नियमित पेयजल आपूर्तिक व्यवस्था सुदृढ़ होएत।
विकासक बहुआयामी पहल
मंत्रिमंडलक निर्णयसभसँ स्पष्ट अछि जे राज्य सरकार स्वास्थ्य, शिक्षा, न्याय, खेल आ शहरी आधारभूत सुविधाक विस्तार पर समान रूपसँ ध्यान दैत अछि। विशेषज्ञसभक अनुसार ई निर्णयसभ बिहारक समग्र विकासमे महत्वपूर्ण भूमिका निभाओत।
