बिहार बीएड कॉमन एंट्रेंस टेस्ट २०२४ केर परिणाम घोषित कऽ देल गेल अछि। उम्मीदवार आधिकारिक वेबसाइट पर रोल नंबर दर्ज कऽ स्कोरकार्ड देख सकैत छथि।
ललित नारायण मिथिला विश्वविद्यालय (एलएनएमयू) बिहार बीएड कॉमन एंट्रेंस टेस्ट (सीईटी-बीएड २०२४) २०२४ केर परिणाम घोषित कऽ देलक अछि। अभ्यर्थी biharcetbed-lnmu.in विश्वविद्यालयक आधिकारिक वेबसाइट पर जा कऽ अपन परिणाम देखि सकैत छथि। प्रवेश परीक्षा २५ जूनकेँ राज्यभरिक निर्दिष्ट केन्द्रपर आयोजित कयल गेल छल।
प्रोविजनल आंसर- कुंजी २७ जूनकेँ जारी कयल गेल छल आ अभ्यर्थी सभकेँ आपत्ति उठयबाक लेल २९ जून धरि समय देल गेल छल। एहि पर प्राप्त आपत्तिक निपटाराक बाद अंतिम परिणाम घोषित कऽ देल गेल अछि।
बिहार बीएड रिजल्ट २०२४ केना देखल जाय :
आधिकारिक वेबसाइट biharcetbed-lnmu.in पर जाउ।
होम पेज पर देल गेल बिहार बीएड सीईटी २०२४ रिजल्ट केर लिंक पर क्लिक करू।
विवरण भरि कए लॉगिन करू आ रोल नंबर आदि दर्ज कए सबमिट करू। परिणाम अहाँक स्क्रीन पर देखाइ देत। जाँच करू आ प्रिंट आउट लिअ।
परीक्षामे सफल अभ्यर्थी बिहारक विभिन्न कॉलेजमे बैचलर ऑफ एजुकेशन (बीएड) पाठ्यक्रममे प्रवेश पाबि सकैत छथि। प्रवेश काउंसलिंगक माध्यमसँ होएत। संस्थान द्वारा काउंसलिंग कार्यक्रम जल्दिये जारी कयल जायत। काउंसलिंगमे शामिल होबय लेल अभ्यर्थीकेँ पंजीकरण करय पड़त। परीक्षामे प्राप्त अंकक आधार पर सीट आवंटित कयल जायत। काउंसलिंग आ परिणामसँ सम्बन्धित बेसी जानकारीक लेल उम्मीदवार विश्वविद्यालयक आधिकारिक वेबसाइट पर जा सकैत छथि।
बीएड संयुक्त प्रवेश परीक्षाक लेल पंजीकरण प्रक्रिया ३ मईसँ शुरू भेल आ २६ मई धरि चलल। विलंब शुल्कक संग २७ मई सँ २ जून धरि आवेदन स्वीकार कयल गेल छल। आवेदन सुधार विंडो १ जूनसँ ४ जून तक खोलल गेल छल आ प्रवेश पत्र १७ जूनकेँ जारी कयल गेल छल।
