प्रधानमंत्री नरेन्द्र मोदी सोमदिन ओडिशाक नबरंगपुरमे एकटा चुनावी जनसभाकेँ सम्बोधित करैत झारखण्डमे ईडीक छापाक उल्लेख कयलनि आ कांग्रेसक सङ्ग-सङ्ग इंडी गठबंधनपर सेहो जोरदार हमला कयलनि।
पीएम मोदी कहलनि, “हम एकटा गरीब मायक बेटा छी आ हम गरीबक दर्द बुझैत छी। हम एक रुपया पठायब आ केकरो एक पाई पर्यंत नहिं खाए देब। जे खाएत, ओ जेलक रोटी चबायत। एखनि अहाँ घर जाउ आ टीवी पर देखू, एतय पड़ोसी झारखंडमे नोटक पहाड़ भेटि रहल अछि। मोदी लोकक चोरी कयल माल पकड़ि रहल अछि। जँ हम ओकर चोरी आ लूटनाइ बंद कए दी तऽ ओ मोदीकेँ गारि देत कि नहि ? मुदा, हमरा गारियो खा कऽ अहाँक पाई-पाई आ अहाँक हकक पाई बचेबाक चाही कि नहि ?”
मोदी आगू कहलनि “ताहि लेल मोदी जनधन खाता, आधार आ मोबाइलक एहेन त्रिशक्ति बनेलक जे गरीबक पाइ केर लूट बंद भऽ गेल। आब घर बनयबाक पाइ सोझे अहाँक खातामे जाइत अछि, गैसक पाइ सोझे अहाँक खातामे जाइत अछि, मनरेगाक पाइ सोझे अहाँक खातामे, किसान सम्मान निधिक पाइ सोझे अहाँक खातामे, अर्थात सभकेँ सीधा लाभ, कोनो भेदभाव नहिं, एवं इ मोदीक गारंटी अछि।
ओ कहलनि, “अहाँक उत्साह साफ बता रहल अछि जे एहि बेर बीजद जायत आ भाजपा आओत। ओडिशामे पहिल बेर डबल इंजन सरकारक गठन होयत। ओडिशाकेँ भाजपाक पहिल मुख्यमंत्री भेटत आ ओडिशाक बेटी वा बेटा एतय मुख्यमंत्री बनत। केओ बाहरी नहिं बनत। छत्तीसगढ़ अहाँक पड़ोसमे अछि, १५ सालसँ भाजपाक सरकार छल, हालमे राज्यक जनता फेरसँ भारी बहुमतसँ भाजपाकेँ चुनलक। आइ छत्तीसगढ़ सरकार एकटा आदिवासी बेटा द्वारा चलायल जा रहल अछि। भाजपा छत्तीसगढ़केँ संवारि रहल अछि।”
प्रवर्तन निदेशालय (ईडी) झारखंडक मंत्री आलमगीर आलमक पीए संजीव कुमार आ हुनकर घरेलू नौकरक परिसरसँ २५ करोड़ टाका नकद बरामद कयलक अछि। प्रधानमंत्री मोदी सोमदिन एकटा चुनावी रैलीमे एहि पर प्रतिक्रिया देलनि।
